Літоўскія памежнікі трэці дзень запар збіваюць дроны з беларускімі цыгарэтамі

13 лістапада, Позірк. Памежнікі літоўскай заставы Пурвенай 12 лістапада перахапілі чарговы дрон, з дапамогай якога кантрабандысты перапраўлялі з Беларусі ў Літву тысячу пачкаў цыгарэт, паведаміла Служба аховы дзяржаўнай мяжы (САДМ) МУС балтыйскай дзяржавы.

Адзначаецца, што аперацыі па перахопе такіх беспілотнікаў, якія заляцелі з Беларусі, супрацоўнікі САДМ праводзілі ў Шальчынінкайскім раёне тры дні запар — кожны раз атрымоўвалася пасадзіць адзін дрон з кантрабандным грузам.

На гэты раз беспілотнік быў выведзены са строю з дапамогай спецыяльнага абсталявання і перахоплены паблізу вёскі Даўгідоніс (недалёка ад Воранаўскага раёна Гродзенскай вобласці).

Дрон перамяшчаў дзве скрынкі цыгарэт Minsk Superslims, вырабленых на гродзенскай тытунёвай фабрыцы “Нёман” і маркіраваных беларускімі акцызнымі маркамі.

Кошт гэтага кантрабанднага грузу, уключаючы падаткі, якія павінны быць выплачаныя ў Літве, перавышае 5 тыс. еўра.

Адзначаецца, што ўсяго з пачатку года памежнікі ўжо пасадзілі 54 дроны, якія перавозілі з Беларусі кантрабандныя цыгарэты, — столькі ж, колькі за ўвесь 2024 год.

У канцы кастрычніка Літва сутыкнулася з неаднаразовым масавым прылётам з Беларусі паветраных шароў і метэазондаў, якія таксама выкарыстоўваюць кантрабандысты для перакідання цыгарэт. З-за аэрастатаў даводзілася прыпыняць працу аэрапорта ў Вільнюсе, што цягнула за сабой затрымку і адмену рэйсаў. Рэагуючы на гэта, улады Літвы некалькі разоў часова закрывалі пункты пропуску, а 29 кастрычніка ўрад вырашыў закрыць іх на больш працяглы тэрмін — да 24:00 30 лістапада (1:00 1 снежня па мінскім часе) з магчымасцю падаўжэння.

Апошні раз аэрапорт у Вільнюсе часова закрываўся з-за метэазондаў у ноч на 11 лістапада.