21 лістапада, Позірк. Далейшы ціск на рэжым Аляксандра Лукашэнкі абмяркоўваўся на сустрэчы намесніка кіраўніцы Аб’яднанага пераходнага кабінета (АПК), кіраўніка Народнага антыкрызіснага ўпраўлення (НАУ) Паўла Латушкі з намесніцай міністра замежных спраў Літвы Аўдрай Пляпітэ, паведаміла 21 лістапада прэс-служба АПК.
Адзначаецца, што Латушка і спікер Каардынацыйнай рады Арцём Брухан “прэзентавалі бачанне далейшай стратэгіі па выкарыстанні санкцыйнага ціску на рэжым Лукашэнкі”, у тым ліку “абмеркавалі неабходнасць увядзення дадатковых прававых падстаў у рамках ЕС, звязаных з гібрыднай агрэсіяй рэжыму супраць суседніх дзяржаў”.
Намеснік кіраўніцы АПК, як паведамляецца, “дэталёва праінфармаваў літоўскі бок пра працяг працы, якую вядзе НАУ па пытаннях крымінальна-прававога пераследу прадстаўнікоў рэжыму ў рамках Міжнароднага крымінальнага суда, садзейнічаючы разгляду адпаведнага звароту ўрада Літвы ў МУС на падставе фактаў здзяйснення прадстаўнікамі рэжыму Лукашэнкі злачынстваў супраць чалавечнасці”.
“Асобна Павел Латушка праінфармаваў пра працу па зборы доказаў для спецыяльнага трыбунала па злачынстве агрэсіі супраць Украіны, а таксама выказаў падтрымку дзейнасці Літвы, якая падала заяву ў Міжнародны суд ААН супраць Беларусі за арганізацыю і заахвочванне незаконнай перапраўкі мігрантаў праз агульную мяжу”, — гаворыцца ў паведамленні.
Абмяркоўваючы пытанне пунктаў пропуску, Латушка “адзначыў важнасць таго, што адкрытая мяжа дазволіць захаваць магчымасць для паездак беларусаў у Еўрасаюз і падтрымліваць міжчалавечыя кантакты беларусаў з краінамі ЕС”. Пры гэтым ён падкрэсліў, што “такім правам не змогуць скарыстацца ні Лукашэнка, ані прадстаўнікі яго рэжыму, якія знаходзяцца ў санкцыйных спісах Еўрасаюза”.
Літва з’яўляецца адной з краін, улады якой увесь час заяўляюць пра неабходнасць узмацніць санкцыі ў дачыненні да рэжыму Лукашэнкі. Напрыклад, пастрожыць абмежавальныя меры заклікаў 17 лістапада на пасяджэнні Савета ЕС па агульных справах намеснік міністра замежных спраў Літвы Сігітас Міткус.
