Наваполацкая кватэра кіраўніка БСДП “Народная Грамада” Вільскага не была прададзеная з аўкцыёну праз адсутнасць пакупнікоў
30 лістапада, Позірк. Не адбыўся электронны аўкцыён па продажы трохпакаёвай кватэры плошчай 71,3 кв. м, размешчанай у шматпавярховым доме ў Наваполацку (Віцебская вобласць), вынікае з інфармацыі на адпаведнай старонцы партала “БелЮрЗабеспячэнне”.
Прычынай пазначана “адсутнасць удзельнікаў”.
Аб выстаўленні кватэры на таргі паведамлялася 27 кастрычніка. З апісання лота вынікала, што нерухомасць арыштаваная следчымі органамі, прадаецца разам з мэбляй, бытавой тэхнікай, дыванамі, шторамі і інш.
У кватэры зарэгістраваныя тры чалавекі, “даўжніком” пазначаны Вільскі Яўген Сяргеевіч — асабістыя даныя цалкам супадаюць з данымі выконваючага абавязкі старшыні Беларускай сацыял-дэмакратычнай партыі “Народная Грамада” (не зарэгістраваная).
Стартавы кошт кватэры — 141.710 рублёў (больш за 47,5 тыс. долараў).
Вільскі знаходзіцца па-за Беларуссю. Быў асуджаны завочна Брэсцкім абласным судом у ліпені мінулага года да 12 гадоў пазбаўлення волі, яму быў таксама прызначаны штраф 480 тыс. рублёў. Прыгавор уступіў у сілу ў кастрычніку таго ж года.
Разам з ім па справе “Форуму дэмакратычных сіл Беларусі” былі асуджаныя зніклы ў канцы жніўня гэтага года Анатоль Котаў, а таксама Вадзім Дзмітронак, Вольга Карач і Вераніка Цапкала. Усе фігуранты прызнаныя вінаватымі паводле арт. 357 (змова ці іншыя дзеянні, учыненыя з мэтай захопу дзяржаўнай улады) і 3611 (стварэнне экстрэмісцкага фарміравання альбо ўдзел у ім) Крымінальнага кодэкса.
Вызвалены 11 верасня ў рамках здзелкі паміж адміністрацыяй прэзідэнта ЗША Дональда Трампа і Алксандрам Лукашэнкі старшыня БСДП “Народная Грамада” Мікалай Статкевіч адмовіўся пакідаць краіну. Некаторы час ён правёў паміж памежнымі пераходамі Каменны Лог (Беларусь) і Мядзінінкай (Літва), пасля чаго вярнуўся на беларускую тэрыторыю. З тых часоў пра яго лёс дакладнай інфармацыі няма.
Канфіскацыя і продаж з аўкцыёну нерухомасці і іншай асабістай маёмасці — адна з формаў пераследу апанентаў рэжыму Аляксандра Лукашэнкі, якія знаходзяцца за мяжой альбо ў зняволенні. Раней паведамлялася аб рэалізацыі на аўкцыёне маёмасці палітыкаў Віктара Бабарыкі, Валерыя Цапкалы, спартсменкі Аляксандры Герасімені і інш.
