Лукашэнка вярнуўся ў Беларусь пасля 12-дзённай адсутнасці, пра анансаваную на 6 снежня сустрэчу з султанам Амана прэс-служба не паведаміла

7 снежня, Позірк. Аб завяршэнні “вялікай камандзіроўкі” і вяртанні Аляксандра Лукашэнкі ў Беларусь паведамляе неафіцыйны тэлеграм-канал яго прэс-службы.

У Беларусь Лукашэнка вярнуўся з Амана, аб паўторным прыбыцці куды з Алжыра паведамлялася 3 снежня.

Тады анансаваўся “шэраг непублічных сустрэч” з удзелам палітыка, а таксама — 6 снежня — сустрэча з султанам Амана, якая мелася падсумаваць “вынік усіх праведзеных перамоваў”.

Пра гэтую сустрэчу прэс-служба Лукашэнкі нічога не паведаміла. 5 снежня яна распаўсюдзіла інфармацыю пра перамовы з прэзідэнтам Аманскага інвестыцыйнага агенцтва Абдулсаламам Аль-Муршыдзі. Ключавымі тэмамі размовы былі названыя стварэнне сумеснага інвестыцыйнага фонду ў Мінску (для фінансавання праектаў на тэрыторыі Беларусі), будаўніцтва цэлюлозна-кардоннага камбіната ў Беларусі, аманскага лагістычнага хаба для беларускіх тавараў, прапрацоўка маршруту “Поўнач-Поўдзень“, інвестыцыі ў аграпрамысловы комплекс Беларусі з пастаўкамі харчавання ў Аман і краіны гэтага рэгіёна, а таксама абмеркаванне экспарту аманскіх морапрадуктаў у Беларусь. Заяўлялася, што ў рамках “турыстычнага кластара“ была разгледжаная магчымасць выкарыстання Амана як пляцоўкі для сумесных праектаў, а таксама ўкладанняў у турыстычныя аб’екты Беларусі.

Першы раз падчас замежнай паездкі Лукашэнка прыбыў у Аман увечары 28 лістапада. Аднак на публіцы з’явіўся толькі на кароткі час 1 снежня — перад закрытымі перамовамі з султанам Хайсамам бін Тарык аль Саідам.

2 снежня палітык з’ехаў з Амана ў Алжыр. На наступны дзень ён заявіў аб сваёй дамоўленасці з прэзідэнтам Алжыра Абдэльмаджыдам Тэбунам давесці беларускі тавараабарот з гэтай краінай да 500 млн долараў.

Кіраўнік Народнага антыкрызіснага ўпраўлення Павел Латушка ахарактарызаваў паездку Лукашэнкі ў Аман не як рабочы, як было заяўлена беларускім бокам, а як прыватны візіт. На перамовах Лукашэнкі і яго сыноў Віктара і Мікалая з султанам гэтай дзяржавы 1 снежня адсутнічалі дзяржаўныя сцягі краін, адзначыў палітык на сваім ютуб-канале.

Лукашэнка адсутнічаў у Беларусі з 26 лістапада. Акрамя Амана і Алжыра, ён наведаў Кыргызстан і М’янму.