Дарадца Ціханоўскай: Практычна штодня КДБ пагражае нашым супрацоўнікам

4 студзеня, Позірк. З моманту аб’яўлення аб зніжэнні ўзроўню аховы Святланы Ціханоўскай у Літве яе офіс сутыкнуўся з узмацненнем ціску з боку рэжыму Аляксандра Лукашэнкі, заявіў дыпламатычны саветнік дэмлідара Дзяніс Кучынскі.

“Практычна кожны дзень супрацоўнікі КДБ звязваюцца з нашымі супрацоўнікамі, пагражаюць іх сваякам у Беларусі і здзяйсняюць кібератакі. Пагрозы атрымліваюць як асабіста Святлана Ціханоўская, так і супрацоўнікі яе офіса”, — цытуе Кучынскага Delfi са спасылкай на агенцтва ELTA.

Дзяржаўная прапаганда “таксама выкарыстоўвае гэтую сітуацыю для ўзмацнення ціску на ўсю дэмакратычную супольнасць”, сказаў ён.

Пра тое, што Літва змяншае ўзровень фізічнай аховы Ціханоўскай, якая разам з сям’ёй пражывае ў Вільні, стала вядома 7 кастрычніка мінулага года. Афіцыйная прычына — рэвізія ступені пагроз.

Шэраг літоўскіх палітыкаў раскрытыкаваў гэтае рашэнне.

Кіраўнік урада Інга Ругінене адзначыла, што ахова не знята, але “скарэкціравана з улікам бягучых рэалій”.

8 кастрычніка Кучынскі заявіў, што праца фізічнага офіса ў літоўскай сталіцы прыпынена ў сувязі “са зменамі ў сістэме аховы і бяспекі”.

14 кастрычніка прэзідэнт Гітанас Наўседа заявіў, што сітуацыя з аховай Ціханоўскай драматызуецца.

17 кастрычніка стала вядома, што літоўскія ўлады часова вярнулі Ціханоўскай ахову — да таго часу, пакуль не будзе сфарміравана новая сістэма бяспекі.

22 кастрычніка намеснік кіраўніка Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка паведаміў аб “пагрозах учынення забойства”, якія паступілі на яго адрас і ў адрас Ціханоўскай.

10 снежня “Наша ніва” і беларуская служба “Радыё Свабода” са спасылкай на свае крыніцы паведамілі, што Ціханоўскай і частцы супрацоўнікаў ОСТ не вярнулі ахову ў Літве, у сувязі з чым частка супрацоўнікаў пераязджае ў Варшаву.

У той жа дзень, каментуючы гэта “Позірку”, яе галоўны дарадца Франак Вячорка заявіў, што рашэння аб пераездзе офіса, яго часткі і самой дэмлідара з Вільнюса не прымалася.

19 снежня стала вядома, што ахову Ціханоўскай у Літве будзе забяспечваць мясцовая паліцыя.

Дарадца прэм’ер-міністра Літвы Альгірдас Дабравольскас у той жа дзень заявіў, што ахова Ціханоўскай “адпавядае ўзроўню пагрозы”.