Лукашэнка ў Маскве абвінаваціў ЕС у “падрыўной працы”, Хрэнін — у падрыхтоўцы да вайны
12 лістапада, Позірк. Еўрапейская сістэма барацьбы з гібрыднымі пагрозамі “часта выходзіць за тэрыторыю Еўрасаюза, праводзячы падрыўную работу ў трэціх краінах”, заявіў Аляксандр Лукашэнка на сесіі Савета калектыўнай бяспекі АДКБ 11 лістапада ў Маскве.
“Прыклад — мэтавыя групы ЕС па барацьбе з гібрыднымі пагрозамі, разгорнутыя напярэдадні важных электаральных кампаній у шэрагу дзяржаў постсавецкай прасторы. Нібыта з мэтай “процідзеяння замежнаму ўмяшанню”, — заявіў ён. — Цікава атрымліваецца — умяшанне ў мэтах процідзеяння ўмяшанню”.
Лукашэнка, паводле паведамлення яго прэс-службы, раскрытыкаваў заходніх суседзяў у пашырэнні паняцця “гібрыдная пагроза” за кошт уключэння ў яго нелегальнай міграцыі і кантрабанды, у якіх нібыта “яны самі найперш замяшаныя”.
Спікер заклікаў “узмацніць ваенны патэнцыял АДКБ” і падтрымаў рашэнні аб стварэнні мабільных падраздзяленняў супрацьпаветранай абароны і ўдасканаленні Калектыўных авіяцыйных сіл. На яго думку, неабходна “адаптаваць ваенныя механізмы да сучасных умоў” і ўлічваць вопыт прымянення беспілотнікаў ва ўзброеных канфліктах.
Лукашэнка паскардзіўся на “мэтавыя хакерскія атакі, арміі ботаў, выкарыстанне проксі-хакерскіх груп, генерацыю фэйкаў”, якія “непамерна таннейшыя за стратэгічных бамбавікоў і крылатых ракет, але пры гэтым могуць нанесці сур’ёзны ўрон”.
Аратар таксама заявіў аб “трансфармацыі тэрарыстычнай дзейнасці”. “Яе суб’ектам стала цэлая дзяржава, а тэрарызм — першарадным інструментам вырашэння палітычных пытанняў у двухбаковых адносінах. На сістэмнай аснове адпрацоўваюцца ўдары па энергетычнай і грамадзянскай інфраструктуры — аб’ектам энергетыкі, лагістычных комплексах, дата-цэнтрах, аўтатранспарту, турыстычным аб’ектах”, — сказаў ён, верагодна, маючы на ўвазе дзеянні Кіева ў адказ на тэрыторыі РФ, змаўчаўшы аб сістэматычных ваенных злачынствах Масквы.
Небяспекай спікер назваў “трэніроўкі войскаў і спецпадраздзяленняў” нібыта ля межаў краіны, “мілітарызацыю краін Захаду”.
Пры гэтым ён згадаў пратэсты ў Беларусі ў 2020-м і ў Казахстане ў 2022 годзе (для прыгнечання былі выкарыстаныя “калектыўныя міратворчыя сілы“ АДКБ): “Цалкам нечакана, як было ў Беларусі ці Казахстане, узнікнуць гэтыя праблемы, і мы будзем з бухты-барахты на гэта рэагаваць. парушэнне Канстытуцыі той ці іншай дзяржавы дэстабілізаваць абстаноўку ўнутры дзяржаў. Гэта адна з найважнейшых задач. Стабільнасць мы забяспечым, калі пра нашу арганізацыю знутры гаварыць“.
Аб правядзенні заходнімі краінамі “комплексу своечасовых мерапрыемстваў падрыхтоўкі да вайны” заявіў міністр абароны Беларусі Віктар Хрэнін расійскім дзяржСМІ на палях маскоўскага саміту.
Мінск, паводле сцвярджэння прэс-службы Мінабароны, “бачыць, як удасканальваецца інфраструктура, адпрацоўваецца лагістыка: аэрадромы, базы захоўвання”: “Я ўжо не гавару пра пункты кіравання, пра колькасць мерапрыемстваў аператыўнай падрыхтоўкі, якая ў разы ўзрасла, і той разведвальнай дзейнасці, якая вядзецца супраць Рэспублікі Беларусь і Расійскай Федэрацыі”.
З вясны 2021 года на граніцы Беларусі і краін ЕС працягваецца міграцыйны крызіс. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Беларусь падтрымлівае РФ у развязанай ёю ў лютым 2022 года поўнамаштабнай вайне супраць Украіны.
Лукашэнка падзякаваў Пуціну за ўзбраенні і падтрымку жывой сілай
10 лістапада, Пазірк. За пастаўку ўзбраенняў і падтрымку жывой сілай падзякаваў Аляксандр Лукашэнка Уладзіміру Пуціну на сустрэчы з прэзідэнтам Расіі ў яго падмаскоўнай рэзідэнцыі Нова-Агарова ўвечары 10 лістапада. Перамовы прайшлі напярэдадні пасяджэння Савета калектыўнай бяспекі АДКБ. "Што тычыцца бяспекі, я …
