У 33-ю гадавіну ўсталявання дыпламатычных стасункаў паміж Мінскам і Прагай Ціханоўская падзякавала Чэхіі за падтрымку беларусаў

5 студзеня, Позірк. “Дзякуй, Чэхія, за падтрымку беларусаў”, — адзначыла дэмакратычны лідар Святлана Ціханоўская 5 студзеня, у 33-ю гадавіну ўстанаўлення дыпламатычных стасункаў паміж Мінскам і Прагай.

На сваёй старонцы ў сацыяльнай сетцы Х палітык нагадала, што ў 2024 годзе яна ўручыла чэшскаму прэзідэнту Пятру Павелу “крыж добрасуседства”. “Сімвал нашага сяброўства і агульнай прыхільнасці да свабоды”, — патлумачыла яна сутнасць заснаванай беларускімі дэмсіламі ўзнагароды.

Летась у кастрычніку Ціханоўская павіншавала з перамогай на выбарах у Палату дэпутатаў Чэхіі рух ANO і яе лідара, прэм’ер-міністра ў 2017–2021 гадах Андрэя Бабіша (зноў заняў пасаду кіраўніка ўрада 9 снежня 2025-га).

“Чэшская Рэспубліка заўсёды была адным з самых верных саюзнікаў беларускай грамадзянскай супольнасці і дэмакратычных сіл, — напісала тады палітык на сваёй старонцы ў сацсетцы Х. — Я ўдзячная за пэўную падтрымку, якую атрымала свабодная Беларусь”.

“Я веру, што новы ўрад Чэхіі, сфармаваны па выніках гэтых выбараў, захавае цвёрды курс на салідарнасць і працягне падтрымліваць нашу барацьбу за свабоду і вяршэнства права”, — падкрэсліла палітык.