МЗС Польшчы выклікаў часовага паверанага ў справах Беларусі з-за прылёту 150 паветраных шароў

22 студзеня, Позірк. Міністэрства замежных спраў Польшчы выклікала часовага паверанага ў справах Беларусі, запатрабаваўшы тлумачэнняў з нагоды прылёту ў краіну 150 паветраных шароў у ноч на 17 студзеня, паведамляе партал Wiadomosci.

“Беларускі бок атрымаў вельмі выразны сігнал аб тым, што мы не ўхваляем падобныя дзеянні“, — цытуе партал прэс-сакратара МЗС Мацея Вевіёра.

Афіцыйнага паведамлення МЗС Польшчы на гэты конт пакуль няма.

Выданне адзначае, што маштаб з’явы выключаў аматарскую дзейнасць злачынных кантрабандных груповак. “Хоць да кожнага са знойдзеных паветраных шароў сапраўды былі прымацаваныя цыгарэты, мы таксама выявілі абсталяванне, якое паказвае на працу прафесіяналаў“, — сказаў ананімны суразмоўца партала.

Неафіцыйная інфармацыя з крыніц, блізкіх да ваенных і Міністэрства ўнутраных спраў і адміністрацыі, паказвае на тое, што шары былі прыкрыццём: аперацыя дазволіла беларускаму боку праверыць вышыню і адлегласць, на якой польскія сістэмы выяўляюць малыя аб’екты, а таксама адсачыць спробы польскіх вайскоўцаў заглушыць сігналы перадатчыкаў
У ноч на 17 студзеня ў паветраную прастору краіны пранікла некалькі дзясяткаў аб’ектаў з Беларусі, паведамляла Бюро нацыянальнай бяспекі Польшчы (БНБ).

“Бюро нацыянальнай бяспекі на працягу ўсёй ночы адсочвала гэтае здарэнне, збіраючы і аналізуючы інфармацыю, атрыманую ад ваенных і грамадзянскіх устаноў, — гаварылася ў паведамленні. — Гэтак жа, як і ў выпадку падзеі ў ноч на 25 снежня 2025 года, калі з беларускага кірунку ў польскую паветраную прастору пранікла 59 аб’ектаў, БНБ не выключае, што мы маем справу з правакацыяй пад прыкрыццём кантрабанднай дзейнасці“.

Бюро заклікала сачыць за паведамленнямі паліцыі і пагранведамства, а ў выпадку выяўлення прадметаў, пасылак або абломкаў, якія патэнцыйна могуць быць звязаныя з апісаным здарэннем, “не падыходзіць да іх і неадкладна апавяшчаць адпаведныя службы“.

Паліцыя Польшчы паведаміла, што ўвечары 16 студзеня атрымала ад аператыўнага камандавання Узброеных сіл інфармацыю аб “неапазнаных лятучых аб’ектах (хутчэй за ўсё, кантрабандных шарах), якія з тэрыторыі Беларусі праніклі ў польскую паветраную прастору“.

“Былі пазначаныя прыблізныя месцы з’яўлення на тэрыторыі Падляскага і Люблінскага ваяводстваў, пасля чаго інфармацыя была перададзеная ў адпаведныя тэрытарыяльныя падраздзяленні паліцыі. Мінулай ноччу абломкі шароў разам з цыгарэтамі без польскіх акцызных марак былі канфіскаваны паліцэйскімі ў Беластоку і ў Сокульском павеце“, — адзначыла праваахоўная структура.

Як паведамляў “Позірк“, супрацоўнікі Падляскага аддзела памежнай аховы Польшчы 17 студзеня выявілі чарговыя партыі кантрабандных цыгарэт, дастаўленых з Беларусі па паветры.