Амбасада Беларусі на Кубе папярэдзіла аб прыпыненні палётаў на востраў на нявызначаны тэрмін

12 лютага, Позірк. Аб прыпыненні на нявызначаны тэрмін вылетаў на Кубу паведаміла 12 лютага беларуская амбасада ў гэтай краіне.

Адначасова дыппрадстаўніцтва адзначыла, што беларускія грамадзяне, якія знаходзяцца там, “могуць спланаваць сваё вяртанне ў адпаведнасці з графікам, апублікаваным авіякампаніямі“.

Удакладняецца, што, паводле інфармацыі авіякампаніі “Расія“, для вывазу замежнікаў, якія знаходзяцца на Кубе, арганізаваны рэйсы FV6928 Варадэра – Масква 12, 14, 17, 19, 21 лютага і FV6850 Гавана – Масква 16 лютага.

Nordwind арганізуе рэйсы Варадэра – Масква 12, 14, 18 лютага і Ольгін – Масква 12 лютага, адзначыла замежпрадстаўніцтва.

5 лютага МЗС Беларусі распаўсюдзіў заяву, у якой адзначыў, што “з занепакоенасцю сочыць за сітуацыяй вакол Кубы і паставак энергарэсурсаў у гэтую краіну“.

“Асаблівыя асцярогі“ ў беларускіх дыпламатаў выклікае “пагроза перарастання бягучай эскалацыі ў Карыбскім басейне ў сур’ёзны гуманітарны крызіс з непрагназаванымі наступствамі”.

Паведамлялася, што Мінск “нязменна настойвае на непрымальнасці ўжывання аднабаковых прымусовых мер, якія ствараюць перашкоды для гандлёвых стасункаў паміж дзяржавамі, стрымліваюць працэс усебаковага сацыяльна-эканамічнага развіцця і абцяжарваюць забеспячэнне дабрабыту насельніцтва“.

“Цвёрда перакананыя ў тым, што ўсе рознагалоссі павінны вырашацца шляхам мірнага дыялогу і ў рамках міжнароднага права“, — гаварылася ў заяве.

29 студзеня прэзідэнт ЗША Дональд Трамп падпісаў указ, які абвяшчае надзвычайнае становішча ў краіне і ўстанаўлівае парадак увядзення мыт на тавары з краін, якія прадаюць ці іншым чынам пастаўляюць нафту на Кубу, “з мэтай абароны нацыянальнай бяспекі і замежнай палітыкі ЗША ад зламысных дзеянняў і палітыкі кубінскага рэжыму“.

Указ уводзіць новую тарыфную сістэму, якая дазваляе Злучаным Штатам уводзіць дадатковыя тарыфы на імпарт з любой краіны, якая прама ці ўскосна пастаўляе нафту на Кубу.

У каментары Белага дома адзначалася, што “кубінскі рэжым супрацоўнічае са шматлікімі варожымі краінамі і зламыснымі суб’ектамі, падаючы ім свае ваенныя і выведвальныя магчымасці. Напрыклад, на Кубе знаходзіцца найбуйнейшы замежны аб’ект Расіі па зборы радыёразведвальнай інфармацыі, прызначаны для крадзяжу канфідэнцыйнай інфармацыі, якая тычыцца нацыянальнай бяспекі ЗША“.

Падкрэслівалася, што кубінскі рэжым “пераследуе і катуе палітычных апанентаў, забараняе свабоду слова і прэсы, карумпавана нажываецца на бедствах кубінскага народа і распальвае хаос, распаўсюджваючы камуністычную ідэалогію па ўсім рэгіёне”.

Гэтыя дзеянні, лічаць у Вашынгтоне, “уяўляюць сабой незвычайную і надзвычайную пагрозу нацыянальнай бяспецы і знешняй палітыцы ЗША, якая патрабуе неадкладнага рэагавання для абароны амерыканскіх грамадзян і інтарэсаў”.

Раней ЗША прынялі меры па блакаванні паставак нафты на Кубу, у тым ліку з Венесуэлы, што прывяло да росту цэн на прадукты харчавання і транспарт, а таксама выклікала сур’ёзны дэфіцыт паліва.

30 студзеня Куба абвясціла “міжнароднае надзвычайнае становішча”.

Беларусь і Куба аднагалосна і паслядоўна выступаюць “супраць аднабаковых абмежавальных мер у міжнароднай палітыцы і гандлі“, заявіў Аляксандр Лукашэнка летась 25 чэрвеня на сустрэчы з першым сакратаром Цэнтральнага камітэта Камуністычнай партыі Кубы, прэзідэнтам краіны Мігелем Дыяс-Канель Бермудасам, які наведваў Мінск для ўдзелу ў пасяджэнні Вышэйшага Еўразійскага эканамічнага савета (Куба — назіральнік у ЕАЭС).

Куба — адна з бедных краін Лацінскай Амерыкі і Карыбскага басейна. Пазіцыянуе сябе як сацыялістычная рэспубліка, адзіная партыя ў краіне — Камуністычная, апазіцыя пераследуецца.

У траўні 2025 года ў Гаване прайшло чарговае пасяджэнне кубінска-беларускай камісіі па гандлёва-эканамічным супрацоўніцтве.

У сярэдзіне лютага таго ж года на Нацыянальным прававым інтэрнэт-партале быў апублікаваны пратакол да міжурадавага пагаднення ад 24 чэрвеня 2014 года з пералікам тавараў, якія Беларусь і Куба хацелі б пастаўляць адзін аднаму ў рамках “сустрэчнага гандлю“. Згодна з дакументам, для кожнага боку “пры ўзаемных пастаўках тавараў і паслуг вызначаецца ліміт у 15 млн долараў ЗША на пяцігадовы перыяд“.

17 ліпеня 2024 года прэзідэнт Кубы на сустрэчы з Раманам Галоўчанкам, які тады ўзначальваў беларускі ўрад, асудзіў санкцыі ЗША супраць Беларусі і ўмяшанне ў яе справы.