Вярхоўны суд адхіліў скаргу на вырак палітвязням, абвінавачаным у стварэнні анархісцкай ячэйкі “Чорныя салаўі”

16 лютага, Позірк. Прыгавор у дачыненні да асоб, абвінавачаных у стварэнні анархісцкай ячэйкі “Чорныя салаўі”, пакінуты без змен. Такое рашэнне па выніках разгляду апеляцыйнай скаргі вынесла судовая калегія Вярхоўнага суда па крымінальных справах, паведаміла 16 лютага Генеральная пракуратура.

Прыгавор фігурантам гэтай справы раней вынес Брэсцкі абласны суд. Марыя Місюк была асуджаная на 13 гадоў пазбаўлення волі, Сяргей Жыгалёў і Трафім Барысаў — на 12, Дзмітрый Захарошка — на 10 гадоў і 6 месяцаў, Аляксандра Пуліновіч — на 10 гадоў і 3 месяцы.

Абвінавачанне сцвярджала, што гэтыя людзі “здзейснілі дзеянні па падрыхтоўцы да незаконнага вырабу самаробнай выбухной прылады”, а таксама “правялі выведку для вызначэння найбольш уразлівага месца ў будынку Баранавіцкага РАУС, падрыў якога пацягнуў бы найбольшую шкоду жыццю і здароўю супрацоўнікаў органаў унутраных спраў”.

Фігуранты ў скаргах “аспрэчвалі кваліфікацыю сваіх дзеянняў, прасілі змяніць вырак і знізіць тэрмін пакарання”.

Прыгавор набыў моц.

Усіх згаданых людзей праваабаронцы прызналі палітвязнямі (грамадзянка Украіны Місюк — былая палітзняволеная, яна была вызваленая і высланая з краіны ў лістападзе 2025 года).

13 лютага ўсе фігуранты справы былі ўключаныя ў спіс “асоб, што маюць дачыненне да экстрэмісцкай дзейнасці”. Са спісу вынікае, што яны асуджаныя паводле арт. 341, ч. 1 арт. 130, ч. 1 арт. 13, ч. 4 арт. 295, ч. 1 арт. 13, ч. 3 арт. 289 Крымінальнага кодэкса.

Пра затрыманне непаўналетніх за падрыхтоўку тэрактаў у Беларусі нібыта паводле задання Службы бяспекі Украіны паведамлялася ў ананімным фільме “Дзеці на прыцэле. Завербаваныя ворагам”, які выйшаў 29 красавіка 2024 года на дзяржаўным тэлеканале АНТ.

Паводле звестак праваабарончага цэнтру “Вясна”, на момант затрымання КДБ у сакавіку 2024 года Місюк і Пуліновіч было 16 гадоў, Барысаву 17. Дакладная дата нараджэння астатніх маладых людзей невядомая.

Даведка “Позірку”:

• арт. 130 — распальванне расавай, нацыянальнай, рэлігійнай або іншай сацыяльнай варожасці або варажнечы;
• арт. 289 — акт тэрарызму;
• арт. 295 – незаконны выраб, набыццё, перадача ў валоданне, збыт, захоўванне, перавозка, перасылка або нашэнне агнястрэльнай зброі;
• арт. 341 — апаганенне збудаванняў і псаванне маёмасці.