10 красавіка, Позірк. Сёлета падраздзяленнямі Міністэрства па надзвычайных сітуацыях зафіксаваны 81 лясны пажар, тры тарфяныя, 2.283 гарэнні травы і кустоў, паведаміў 10 красавіка на прэс-канферэнцыі начальнік цэнтра ўзаемадзеяння з грамадскасцю і СМІ ведамства Максім Клачко.
“На жаль, штогод, гэты год не стаў выключэннем, фіксуюцца ахвяры пажараў у прыродных экасістэмах. У бягучым годзе тры чалавекі загінулі ад наступстваў такіх надзвычайных сітуацый. Летась гэтая лічба склала два чалавекі”, — адзначыў прадстаўнік МНС.
Усяго паводле даных ведамства на 6:00 10 красавіка, з пачатку года на тэрыторыі краіны адбылося 2.547 пажараў (на аналагічную дату 2025-га — 2.103, +21,1%), загінулі 248 чалавек (212; +17%).
Асноўнай прычынай узнікнення пажараў на прыродзе Клачко назваў “так званы чалавечы фактар”. “Гэта парушэнне правілаў пажарнай бяспекі пры развядзенні вогнішчаў, спальванне сухой травы, непатушаная цыгарэта. Ёсць выпадкі, калі кінутае проста прамасленая рыззё таксама магло стаць крыніцай узгарання і надзвычайнай сітуацыі. Нярэдкія выпадкі, калі такія пажары здараюцца праз дзіцячае свавольства з агнём”, — падкрэсліў чыноўнік.
Ён нагадаў, што за парушэнне правілаў пажарнай бяспекі, за наведванне лясоў, тарфянікаў у асаблівы перыяд, на парушальніка можа быць накладзеная адміністрацыйная адказнасць.
“Аднак мы павінны казаць, што наша галоўная задача, гэта не пакараць чалавека, а дагрукацца да ўсведамлення яго паводзін. Чалавек павінен разумець усе наступствы, якія могуць быць з-за яго, скажам так, нядбайных дзеянняў”, — адзначыў прадстаўнік МНС.
Закрануў ён і тэму развядзення вогнішчаў на прыватных паддворках: “Ніхто не забараняе [гэта рабіць]. Але неабходна гэта рабіць пры захаванні правіл пажарнай бяспекі. Бяспечней за ўсё гэта рабіць у металічнай скрыні пад наглядам чалавека ў зацішнае надвор’е. Абавязкова месца спальвання неабходна акапаць. Побач неабходна мець першасныя сродкі пажаратушэння — вогнетушыцель, запас вады, рыдлёўка, пясок і пад пастаянным наглядам і кантролем чалавека. Нельга давяраць гэтую працу малалетнім дзецям, людзям сталага ўзросту. З прычыны сваіх псіхафізічных уласцівасцяў яны не заўсёды змогуць своечасова распазнаць бяду і распачаць неабходныя меры па ліквідацыі дадзеных узгаранняў“.
Нягледзячы на тое, што за пяць гадоў колькасць лясных пажараў у Беларусі зменшылася, кошт шкоды ад іх істотна ўзрос, сведчыць праведзены “Позіркам” аналіз даных Нацыянальнага статыстычнага камітэта.
У цэлым па краіне ўзгаранняў стала на 22% менш (колькасць знізілася з 1.034 па выніках 2020 года да 807 па выніках 2025-га).
На 2,9% скараціліся выдаткі на тушэнне і ліквідацыю наступстваў лясных пажараў (з 707.397 да 687.215 рублёў).
Разам з тым сума шкоды, нанесенай ляснымі пажарамі за пяцігадовы перыяд, павялічылася ў 102,7 раза — з 962.133 да 98.879.969 рублёў.
23 ліпеня 2025 года паведамлялася, што Фонд глабальнага развіцця і супрацоўніцтва “Поўдзень-Поўдзень“ (Кітай) выдзеліць Беларусі 2 млн долараў на ахову лясоў ад пажараў.
Беларусь на працягу апошніх 10–15 гадоў атрымлівала сістэматычнае фінансаванне ў рамках праектаў з Еўрапейскім саюзам па лініі абароны лясоў і падтрымкі службы выратавання.
У рамках праекта ЕС “Польшча-Беларусь-Украіна” (2018–2021), мэтай якога было стварэнне сумеснай сістэмы хуткага рэагавання на надзвычайныя сітуацыі, у Беларусь былі пастаўлены пажарныя і выратавальныя аўтамабілі, прайшло навучанне персаналу. Бюджэт праекта склаў каля 4 млн еўра (90% фінансавання).
З 2019 па 2020 год рэалізоўваўся праект “Экахім“ з акцэнтам на аварыйную экалагічную і хімічную бяспеку, які ўключаў мадэрнізацыю пажарна‑выратавальнага абсталявання і сумесныя вучэнні службаў Беларусі і Польшчы. Агульны бюджэт — больш за 2 млн еўра.
Супрацоўніцтва ЕС з Мінскам у выглядзе міжнароднай тэхнічнай дапамогі было прыпынена амаль па ўсіх напрамках у сувязі з рэпрэсіямі пасля прэзідэнцкіх выбараў 2020 года і ўдзелам краіны ў расійскай агрэсіі супраць Украіны.
