Для гасцей і ўдзельнікаў “Славянскага базару” ўводзіцца традыцыйны бязвіз

10 чэрвеня, Позірк. Аб увядзенні традыцыйнага бязвізу для гасцей і ўдзельнікаў Міжнароднага фестывалю мастацтваў “Славянскі базар у Віцебску” паведаміў 10 чэрвеня Дзяржаўны пагранічны камітэт (ДПК).

Сёлета фестываль пройдзе з 14 па 20 ліпеня.

Адзначаецца, што ў адпаведнасці з распараджэннем Аляксандра Лукашэнкі бязвізавы парадак уезду будзе дзейнічаць для замежнікаў з 71 дзяржавы, якія едуць на фестываль праз міжнародныя пункты пропуску.

“Фестывальны бязвіз” уводзіцца з 4 па 31 ліпеня, удакладняе ДПК. Каб ім скарыстацца, “замежным гасцям спатрэбяцца сапраўдны дакумент для выезду за мяжу (замежны пашпарт), арыгінальны або электронны білет на мерапрыемствы фестывалю, якія праводзяцца ў Летнім амфітэатры альбо ў канцэртнай зале “Віцебск”, гаворыцца ў паведамленні.

Дзяржпагранкамітэт звяртае ўвагу, што “адзін білет дазваляе аднаразова ўехаць у Беларусь без візы аднаму замежнаму грамадзяніну не пазней за дату правядзення названага ў білеце мерапрыемства”.

Бязвіз для гасцей мерапрыемстваў “Славянскага базару” ўстанаўліваецца рэгулярна з 2019 года.

Варта адзначыць, што з 15 красавіка 2022 года ўведзены бязвізавы рэжым для жыхароў Латвіі і Літвы, з 1 ліпеня таго ж года — для жыхароў Польшчы. 19 ліпеня 2024-га беларускія ўлады распаўсюдзілі бязвізавы рэжым на грамадзян яшчэ 35 краін Еўропы.

Грамадзяне гэтых дзяржаў могуць уязджаць у Беларусь без візы праз усе наземныя і паветраныя міжнародныя пункты пропуску “па сапраўдных дакументах”, знаходзіцца на беларускай тэрыторыі “не больш за 30 сутак з дня ўезду”.

9 снежня 2025 года бязвіз для жыхароў 38 еўрапейскіх краін падоўжаны да канца 2026-га.

“Славянскі базар” праводзіцца ў Віцебску з 1992 года. У праграме фестывалю прадстаўленыя розныя віды культуры і мастацтва — ад музыкі да выяўленчага мастацтва. Традыцыйна мае праўладную і прарасійскую накіраванасць.