У мінскім аэрапорце па вяртанні з Грузіі затрыманы фатограф Аляксандр Шышко

Апублікавана на адкрытай версіі “Позірку” 13 красавіка ў 19:56.

13 красавіка, Позірк. У красавіку 2026 года ў Нацыянальным аэрапорце Мінск быў затрыманы фатограф Аляксандр Шышко. Інфармацыя пра гэта апублікаваная на сайце праекта Dissidentby, “Позірку” яе пацвердзіў праваабаронца Раман Кісляк.

“Аляксандр жыў у Тбілісі мінімум з 2022 года. Чаму ён вярнуўся ў Беларусь, сказаць складана, магчыма, сумаваў па радзіме, родных. Думаю, пралічыўся наконт рызыкі затрымання, думаў, што праскочыць”, — сказаў Кісляк.

Праваабаронца адзначыў, што пасля Дня Волі 2024 года прапагандысты пачалі згадваць Шышко у сваіх матэрыялах. “Наколькі я ведаю, крымінальная справа ўзбуджаная па факце правядзення Дзён Волі за мяжой, і ў межах гэтай справы ў Беларусі ў яго кватэры праводзіўся вобшук”, — дадаў Кісляк.

Як паведамляе Dissidentby, кватэра фатографа арыштаваная, таксама Шышко згадваўся у сюжэце прапагандыста тэлеканала АНТ Ігара Тура.

Улады ў Мінску рэгулярна пагражаюць крымінальным пераследам удзельнікам публічных акцый за мяжой.

3 красавіка паведамлялася пра затрыманне на польска-беларускай мяжы фатографа Андрэя Лянкевіча.

У кастрычніку 2025 года паведамлялася, што больш за сто чалавек было затрымана па вяртанні ў Беларусь, але лічба можа быць значна большай. Пра допыты і затрыманні ў беларускіх пунктах пропуску праваабарончы цэнтр “Вясна” рэгулярна атрымлівае паведамленні ўжо некалькі гадоў.

Супрацоўнікі спецслужбаў ці памежнікі дапытваюць як беларусаў, так і грамадзян іншых краін, правяраюць іх мабільныя тэлефоны, распытваюць у тым ліку пра сваякоў і мэты паездкі за мяжу. У некаторых выпадках “размовы” сканчаюцца затрыманнем.