14 красавіка, Позірк. Па выніках 2025 года тавараабарот паміж Беларуссю і Казахстанам павялічыўся на 30% і склаў 1,2 млрд долараў, паведаміла прэс-служба прэзідэнта гэтай цэнтральнаазіяцкай краіны Касым-Жамарта Такаева.
14-15 красавіка з афіцыйным візітам у Казахстане знаходзіцца міністр замежных спраў Беларусі Максім Рыжанкоў, якога Такаеў прыняў у першы дзень.
Прэзідэнт заявіў міністру аб першараднай увазе да супрацоўніцтва з Беларуссю ва ўсіх сферах і павазе да “беларускай дзяржаўнасці, самабытнай культуры, гісторыі”.
“Я мяркую, што ёсць усе падставы выказаць сёння задавальненне паступальнай дынамікай узаемадзеяння, перш за ўсё ў эканамічнай сферы”, — сказаў Такаеў.
Ён перадаў “словы прывітання і найлепшыя пажаданні” Аляксандру Лукашэнку і анансаваў абмеркаванне ў траўні на пасяджэнні Вышэйшага Еўразійскага эканамічнага савета “акрамя шматбаковага парадку дня” абмеркаванне іншых пытанняў, “звязаных з развіццём стасункаў паміж нашымі дзяржавамі”.
Такаеў і Рыжанкоў падкрэслілі “важнасць далейшага паглыблення супрацоўніцтва ў сферах прамысловай кааперацыі, транспарту, сельскай гаспадаркі, турызму і іншых напрамках”. Асобная ўвага нададзеная “нарошчванню экспарту казахстанскай прадукцыі”. Прэзідэнт Казахстана вітаў маючае адбыцца адкрыццё генеральнага консульства Беларусі ў Алматы, якое “закліканае пашырыць сувязі паміж рэгіёнамі дзвюх краін”.
Прэс-служба МЗС Беларусі паведамляе, што падчас сустрэчы таксама “адбыўся абмен думкамі пра стан і перспектывы развіцця двухбаковага супрацоўніцтва паміж Беларуссю і Казахстанам, а таксама па актуальных пытаннях міжнароднага парадку дня”.
Паводле звестак амбасады Казахстана ў Мінску, у 2023 годзе ўзаемны тавараабарот склаў 948,3 млн долараў ЗША, у 2024-м — 900 млн. Беларускі бок паведамляў аб тавараабароце на ўзроўні 1 млрд 100 млн долараў у 2024 годзе.
