Жыхар Брэсцкай вобласці асуджаны больш як на 19 гадоў зняволення за шэраг злачынстваў, у тым ліку забойства сужыцелькі
5 чэрвеня, Позірк. Суд Пінскага раёна і горада Пінска (Брэсцкая вобласць) прыгаварыў 36-гадовага мясцовага жыхара да 19 гадоў і 3 месяцаў пазбаўлення волі ва ўмовах строгага рэжыму за шэраг цяжкіх і асабліва цяжкіх злачынстваў, паведамляе прэс-служба Генеральнай пракуратуры са спасылкай на абласную пракуратуру.
Згодна з інфармацыяй нагляднага органа, мужчына прызнаны вінаватым паводле ч. 1 арт. 154 (катаванне), ч. 1 арт. 139 (забойства), арт. 366 (гвалт і пагроза гвалтам у дачыненні да іншай асобы, якая выконвае грамадскі абавязак па спыненні злачынства) Крымінальнага кодэкса.
Паводле матэрыялаў справы, 21 кастрычніка 2025 года фігурант учыніў сварку з 30-гадовай сужыцелькай. Паведамляецца, што ён зрэзаў частку валасоў з яе галавы, нанёс не менш за 23 удары рукамі і нагамі па галаве і целе (у тым ліку біў яе галавой аб падлогу). Пры гэтым свае дзеянні мужчына здымаў на камеру мабільнага тэлефона. Пасля катавання ён задушыў жанчыну.
Увесь гэты час мужчыну спрабавала стрымаць бабуля яго сужыцелькі. Заяўлена, што фігурант нанёс ёй не менш за дзевяць удараў па целе, сціскаў ёй шыю, у выніку чаго нанёс пажылой жанчыне цялесныя пашкоджанні.
Паводле інфармацыі ведамства, жыхар Брэсцкай вобласці здзейсніў гэтыя злачынствы праз месяц пасля асуджэння за рабаванне.
На карысць бацькі забітай, які прызнаны пацярпелым, спагнаная кампенсацыя маральнай шкоды ў памеры 50 тыс. рублёў.
Паводле даных Вярхоўнага суда, у 2025 годзе за “злачынствы супраць жыцця і здароўя” асуджана 1.713 чалавек (у 2024-м — 1.974). З іх паводле арт. 139 КК (забойства) — 138 (174), арт. 147 (наўмыснае нанясенне цяжкага цялеснага пашкоджання) — 479 (519), арт. 149 (наўмыснае нанясенне менш цяжкага цялеснага пашкоджання) — 293 (344), арт. 153 (наўмыснае нанясенне лёгкага цялеснага пашкоджання) — 276 (328).
