На турніры пад эгідай МУС Беларусі адзначыліся акупацыйныя войскі РФ, ім уручаны матацыкл

10 чэрвеня, Позірк. Прадстаўнікі “САХР “Лідар” упраўлення Расгвардыі па Херсонскай вобласці” сталі пераможцамі сярод замежных каманд на штогадовым адкрытым турніры па практычнай (тактычнай) стральбе сярод груп аператыўна-баявога прызначэння пад эгідай МУС Беларусі.

“Акрамя медалёў і дыпломаў яны сталі ўладальнікамі матацыкла“, — паведамляе прэс-служба міністэрства.

Мерапрыемства пад дэвізам “Ні кроку назад“ прайшло з 2 па 9 чэрвеня ў каледжы МУС (вёска Гарані Мінскага раёна) і спартыўна-тактычным комплексе сталічнага АМАП.

Паводле сцвярджэння міністра Івана Кубракова, у спаборніцтвах удзельнічала “эліта спецыяльных падраздзяленняў з брацкіх і дружалюбных [Мінску] краін“. Ён пералічыў Азербайджан, В’етнам, РФ, Таджыкістан і Узбекістан. Таксама былі каманды мясцовых сілавікоў.

Расгвардыя (Федэральная служба войскаў нацыянальнай гвардыі РФ) — дзяржаўная ваенная арганізацыя, якая афіцыйна створаная для “забеспячэння грамадскай бяспекі, аховы важных дзяржаўных аб’ектаў і барацьбы з тэрарызмам“.

На практыцы выкарыстоўвалася для барацьбы з іншадумствам, удзельнічала ў нападзе на Украіну.

Мінск наладжвае ўзаемадзеянне з акупацыйнай адміністрацыяй Расіі на ўсходзе Украіны, называючы ўслед за Масквой акупаваныя землі “новымі тэрыторыямі” Расіі.

Летась у верасні Мінск наведвала дэлегацыя акупаванай РФ часткі Херсонскай вобласці Украіны (кіраўнік Уладзімір Сальда), у кастрычніку — т.зв. “луганскай народнай рэспублікі“ (Леанід Пасечнік).

Візіцёры перыядычна прыязджаюць у Беларусь, з імі сустракаецца Аляксандр Лукашэнка.

У лютым мінулага года прапагандысты Вадзім Гігін (дэпутат Палаты прадстаўнікоў і дырэктар Нацыянальнай бібліятэкі), Георгій Азаронак і лідар прарасійскага “Руху Саюз“ Сяргей Лушч наведалі акупаваную Расіяй частку Запарожскай вобласці Украіны.

22 красавіка 2026 года амбасадар РФ у Беларусі Барыс Грызлоў сустрэўся ў Мінску са студэнтамі з т. зв. “лнр“, “данецкай народнай рэспублікі“ і акупаванай часткі Запарожжа, вынікала з паведамлення дыпмісіі.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Напад пачаўся ў тым ліку з беларускай тэрыторыі.