На пажарах за суткі загінула пяць чалавек, у тым ліку двое дзяцей, узбуджана крымінальная справа (дапоўнена)

14 чэрвеня, Позірк. На пажарах за суткі (з 6 гадзін 13 чэрвеня па 6 гадзін 14-га) у Беларусі загінулі пяць чалавек, у тым ліку двое дзяцей, вынікае са зводкі МНС.

Непаўналетнія загінулі ў Нароўлі (Гомельская вобласць). Як паведамляе прэс-служба Следчага камітэта, у 3 гадзіны 22 хвіліны ў падраздзяленне МНС паступіла паведамленне аб пажары ў прыватным доме на вул. Сацыялістычнай.

“У будынку знаходзіліся сужэнская пара пенсіянераў і чацвёра непаўналетніх. Да прыезду ратавальнікаў відавочцы паспелі дапамагчы выбрацца з дому старэйшаму дзіцяці і дзядулю”, — гаворыцца ў рэлізе.

Ад атрыманых цялесных пашкоджанняў 73-гадовая жанчына памерла на месцы, а яе пяцігадовая праўнучка і дзесяцігадовы праўнук — па дарозе ў бальніцу. У цяжкім стане дастаўлены ў рэанімацыю сямігадовы хлопчык.

На месцы здарэння працуе следча-аператыўная група, супрацоўнікі абласнога следства і крыміналістычнага аддзела, а таксама спецыялісты Дзяржкамітэта судовых экспертыз (ДКСЭ).

“Фіксуецца следавая карціна, апытваюцца сваякі і суседзі загінуўшых”, — адзначае ведамства.

Прэс-служба ДКСЭ паведамляе, што “мужчына 1961 года нараджэння” таксама шпіталізаваны.

МНС, якое першым апублікавала звесткі аб гібелі дзяцей, са свайго боку падрабязнасці не прыводзіць. На мапе да зводкі толькі адзначана колькасць ахвяр у Нараўлянскім раёне (тры).

Таксама два чалавекі загінулі ў Міёрскім раёне (Віцебская вобласць). Дэталі не паведамляюцца.

Усяго, паводле звестак ратавальнікаў, з пачатку 2026 года адбылося 3.669 пажараў (годам раней — 3.248; +13%), на іх загінула 315 чалавек, у тым ліку двое дзяцей (295; +6,8%; 3; -33,3%).