Міліцыя не дала правесці ў Мінскай вобласці выставу дрыфт-аўтамабіляў — удзельнікі прыцягнуты да адміністрацыйнай адказнасці

28 чэрвеня, Позірк. Пра “спыненне незаконнага аўтафестывалю” паведаміла 28 чэрвеня Міністэрства ўнутраных спраў.

Ведамства заяўляе, што ва Уздзенскі РАУС (Мінская вобласць) “паступілі шматлікія паведамленні грамадзян аб цяжкасці дарожнага руху на аўтадарозе Р-23 паблізу вёскі Трысцінец”.

“Нарад, які прыбыў на месца, выявіў вялікую колькасць транспарту ўздоўж трасы, а таксама масавую колькасць людзей на пляцоўках у лесапаласе паблізу”, — гаворыцца ў паведамленні.

Супрацоўнікі міліцыі “паведамілі прысутным аб неабходнасці пакінуць месца несанкцыянаванага збору”, прадстаўнікі Дзяржаўтаінспекцыі “прынялі меры па стабілізацыі дарожнага руху”, адзначае МУС.

“Устаноўлена, што мэтай мерапрыемства з’яўлялася выстава дрыфт-аўтамабіляў. Яго правядзенне ва ўстаноўленым парадку з кампетэнтнымі органамі не ўзгаднялася, удзельнікаў запрашалі праз сацсеткі”, — паведамляе ведамства.

Паводле яго даных, на месцы знаходзілася каля 600 чалавек і больш за 250 транспартных сродкаў. “Адміністрацыйныя матэрыялы ў дачыненні да арганізатараў і актыўных удзельнікаў накіраваныя ў суд”, — заявілі ў МУС.

Міністэрства нагадала, што ў Беларусі “за парушэнне парадку арганізацыі або правядзення масавых мерапрыемстваў прадугледжаная адміністрацыйная адказнасць”, а за “арганізацыю і падрыхтоўку дзеянняў, якія груба парушаюць грамадскі парадак, альбо актыўны ўдзел у іх — крымінальная”.

Адметна, што МУС прыгразіла ўдзельнікам “аўтафестывалю” адказнасцю паводле артыкулаў, якія ўлады з 2020 года актыўна выкарыстоўваюць для палітычнага пераследу грамадзян. У першым выпадку гаворка пра арт. 24.23 КаАП і пакаранне, як правіла, у выглядзе арышту да 15 сутак, у другім — пра арт. 342 КК, які прымяняецца да ўдзельнікаў мірных пратэстаў, якіх прысуджаюць да розных тэрмінаў абмежавання і пазбаўлення волі.

Дрыфт-аўтамабіль — аўтамабіль, спецыяльна падрыхтаваны для праходжання паваротаў у кіраваным заносе на высокай хуткасці. Адрозніваецца ад звычайных аўто тэхнічнымі наладамі і канструкцыяй. Спаборніцтвы па дрыфт-ваджэнню праводзяцца як на аматарскім, так і на прафесійным узроўні.