У “спіс экстрэмістаў” дададзена дзевяць чалавек, сярод іх экс-баец палка Каліноўскага

6 ліпеня, Позірк. Міністэрства ўнутраных спраў 6 ліпеня ўнесла яшчэ дзевяць чалавек у спіс “асоб, якія маюць дачыненне да экстрэмісцкай дзейнасці”. Цяпер у пераліку на сайце ведамства 6.754 пазіцыі.

Тры чалавекі ўнесеныя ў пералік з пазнакай “адбывае пакаранне”. Сярод іх палітвязень, былы баец палка імя Кастуся Каліноўскага Андрэй Сяргееў (пазыўны “Кот”). Падставай для ўключэння яго ў “экстрэмісцкі спіс” стала наяўнасць у выраку артыкулаў 361¹ і 361³ Крымінальнага кодэкса. Вынесены яму прыгавор праваабаронцам невядомы.

З такой жа пазнакай у спісе фігуруюць Сяргей Пако (арт. 130, 361, 342 і 431) і Міхаіл Казека (арт. 368).

З пазнакай “судзімасць не пагашана” (не абавязкова, але можа сведчыць аб вынясенні прыгавору, не звязанага з пазбаўленнем волі) у пералік унесены Таццяна Шарак і Андрэй Іваноў (абодва — арт. 361⁴), Віталь Казлоўскі (арт. 361⁴, 368, 369), Георгій Белавусаў (арт. 342, 361⁴), Алег Каспяровіч (арт. 130²) і Аляксандр Жукаў (арт. 130).

Даведка “Позірку”:

• арт. 130 — распальванне расавай, нацыянальнай, рэлігійнай або іншай сацыяльнай варожасці або варажнечы;
• арт. 130² — адмаўленне генацыду беларускага народа;
• арт. 342 — арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх;
• арт. 361 — заклікі да мер абмежавальнага характару (санкцый), іншых дзеянняў, скіраваных на нанясенне шкоды нацыянальнай бяспецы Рэспублікі Беларусь;
• арт. 361¹ — стварэнне экстрэмісцкага фарміравання або ўдзел у ім;
• арт. 361³ — удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка або падрыхтоўка асоб да такога ўдзелу;
• арт. 361⁴ — садзейнічанне экстрэмісцкай дзейнасці;
• арт. 368 — абраза прэзідэнта;
• арт. 369 — абраза прадстаўніка ўлады;
• арт. 431 — дача хабару.