За паўгода ў Беларусі абавязковая маркіроўка нанесеная на 1,2 млн ювелірных вырабаў

6 ліпеня, Позірк. За паўгода ў Беларусі абавязковая маркіроўка нанесеная на 1,2 млн ювелірных вырабаў, паведамляе прэс-служба Міністэрства фінансаў.

Вытворцамі маркіравана 555 тыс. вырабаў, імпарцёрамі — 286 тыс. вырабаў; рэшткі на складах — 319 тыс., камісійныя і канфіскаваныя тавары — 2 тыс.

Рэалізавана і выведзена з абароту 800 тыс. прамаркіраваных ювелірных вырабаў.

Адзначаецца, што за перыяд тэставання сістэмы з 2022–2025 было прамаркіравана больш за 4,2 млн вырабаў.

Абавязковая маркіроўка ювелірных вырабаў уведзеная ўказам № 378 ад 21 кастрычніка 2025 года.

У адпаведнасці з дакументам маркіроўка ажыццяўляецца пры вырабе “ювелірных ды іншых вырабаў (за выключэннем індывідуальных заказаў), увозе іх на тэрыторыю Беларусі для рэалізацыі, вывазе ў краіны, з якімі заключаныя пагадненні пра ўзаемнае прызнанне сродкаў ідэнтыфікацыі”.

У дзень падпісання ўказа быў ухвалены праект пагаднення з Расіяй аб супрацы ў сферы дзейнасці з каштоўнымі металамі, камянямі і вырабамі з іх.

29 студзеня 2026 года начальнік Дзяржаўнай інспекцыі прабірнага нагляду галоўнага ўпраўлення каштоўных металаў і каштоўных камянёў Міністэрства фінансаў Жанна Рэкун заявіла, што ўведзеная ў Беларусі 1 студзеня абавязковая маркіроўка ювелірных вырабаў сродкамі ідэнтыфікацыі дазваляе адсачыць легальнасць вырабленых тавараў.

Паводле яе слоў, зараз на цэтлік усіх ювелірных вырабаў мае быць нанесены сродак ідэнтыфікацыі ў выглядзе двухмернага матрычнага штрыхкода (квадрат або простакутнік з чорных і белых модуляў).

Таксама можна пабачыць характарыстыкі ўставак, у тым ліку з каштоўных камянёў.

Мінфіну маркіроўка “дае магчымасць прасочвання, збору статыстычнай інфармацыі пра рух, пра перамяшчэнні, пра колькасць продажаў”, сказала чыноўніца.