Мінэканомікі рыхтуе дакумент аб стымулах для ўкаранення робатаў у прамысловасці

29 траўня, Позірк. У Беларусі завяршаецца падрыхтоўка праекта нарматыўнага акта, які “прадугледжвае дадатковыя стымулы для ўкаранення робатаў [у прамысловасці], распрацоўкі кампанентаў для робататэхнікі, софту, інжынірынгу рабатызаваных сістэм”, паведаміў міністр эканомікі Юрый Чабатар на Еўразійскім эканамічным форуме ў Астане.

“Плануецца, што да 2030 года не менш за 70% арганізацый будуць выкарыстоўваць лічбавыя тэхналогіі шостага тэхналагічнага ўкладу (штучны інтэлект, вялікія дадзеныя, інтэрнет рэчаў, лічбавыя двайнікі і інш.)“, — цытуе чыноўніка прэс-служба Мінэканомікі.

У частцы рабатызацыі “пастаўленая задача да 2031 года выйсці на ўзровень 100 робатаў на 10 тыс. работнікаў“, сказаў ён, не ўдакладніўшы, які паказчык дасягнуты на сёння.

Выступаючы на форуме 28 траўня, Аляксандр Лукашэнка заявіў, што “паняццю “штучны інтэлект“ ужо больш за 70 гадоў“: “Гэта не новаўвядзенне сённяшняга дня. І ў Беларусі сістэмная праца над гэтай тэмай ідзе з сярэдзіны 60-х гадоў — яшчэ з часоў стварэння Інстытута тэхнічнай кібернетыкі ў Мінску“.

“Прыгадваю фразу, сказаную на сямейнай вячэры ў [старшыні КНР] Сі Цзіньпіна<…>: “Кітайскую мову не трэба баяцца вывучаць”. Сапраўды так і некаторыя баяцца гэтага штучнага інтэлекту, асабліва людзі старэйшага пакалення“, — цытавала Лукашэнка яго прэс-служба.

Раней прамоўца неаднаразова крытычна выказваўся пра ўвагу да тэмы ШІ, у тым ліку адмаўляючы яго значнасць. “Я аднойчы праехаў на аўтамабілі са штучным інтэлектам. Калі ёсць паласы, круіз-кантроль ўключаеш, і ён чытае дарогу. Можна не кіраваць з дапамогай стырна — [машына] рухаецца ў патрэбным кірунку. Я так моцна задумаўся: ну які тут штучны інтэлект? Працуе аўтаматыка”, — заяўляў Лукашэнка ў студзені.