“Экстрэмісцкімі фарміраваннямі” прызнаныя яшчэ два аб’яднанні — падраздзяленне ГУР Украіны і пляцоўка міжнароднага гандлю

14 ліпеня, Позірк. Камітэт дзяржаўнай бяспекі і Міністэрства ўнутраных спраў прызналі “экстрэмісцкімі фарміраваннямі” два аб’яднанні — “Беларускае падраздзяленне спецыяльнага прызначэння “1514” і праект Kamarouka, вынікае з абноўленага 14 ліпеня спіса на сайце МУС.

Сцвярджаецца, што да падраздзялення “1514” маюць дачыненне Андрэй Трацэўскі, Станіслаў Шашко і Кірыл Балахонаў, да праекта Kamarouka — Дзмітрый Завадскі, Вольга Касянчук і Ксенія Каменка.

“Беларускае падраздзяленне спецыяльнага прызначэння “1514” — элітнае фарміраванне, якое было створана 8 верасня 2024 года, у гадавіну гістарычнай бітвы пад Оршай. Падраздзяленне ўваходзіць у склад “Спецпадраздзялення Цімура” Галоўнага ўпраўлення выведкі (ГУР) Міністэрства абароны Украіны.

Праект Kamarouka пазіцыянуе сябе як “міжнародная платформа беларускага гандлю, вядучая платформа электроннай камерцыі беларусаў свету”.

У пераліку “экстрэмісцкіх фарміраванняў” і “экстрэмісцкіх арганізацый”, які КДБ і МУС Беларусі вядуць ад верасня 2021 года, цяпер 376 пазіцый. Рэальная іх колькасць — 360, паколькі некаторыя згадваюцца двойчы ў розным кантэксце.