Зніжэнне РВСР — сігнал банкамі пра іх правільную палітыку, сцвярджае Галоўчанка
30 ліпеня, Позірк. Зніжэнне разліковай велічыні стандартнай рызыкі (РВСР) для інвестыцыйных крэдытаў да 10,69% ёсць сігналам банкам пра тое, што яны праводзяць правільную палітыку, самастойна зніжаючы кошт запазычанняў і не ўваходзячы ў зону рызыкі, заявіў 30 ліпеня кіраўнік Нацыянальнага банка Раман Галоўчанка.
Паводле слоў чыноўніка, відэафрагмент выступлення якога апублікавала прэс-служба рэгулятара, за першае паўгоддзе выдадзена каля 3,6 млрд рублёў інвестыцыйных крэдытаў.
Даведзены паказчык банкаўскай сістэмай, адзначыў ён, перавыкананы: “Калі яшчэ па выніках першага квартала 2025-га было адмоўнае значэнне — мінус 4%, то цяпер мы выйшлі ў дадатную зону. Для дасягнення гадавога паказчыка банкам неабходна ў другім паўгоддзі прафінансаваць інвестыцыйныя праекты на суму каля 4 мільярдаў рублёў. Задача напружаная, але цалкам выканальная”.
Сярэднюю стаўку па новых інвестыцыйных крэдытах крыху больш за 10% Галоўчанка назваў “неблагім узроўнем”.
Кіраўнік рэгулятара выказаў меркаванне, што гэты ўзровень стаўкі “цалкам дазваляе прадпрыемствам ажыццяўляць прыцягненне інвестыцыйных крэдытаў на тэхнічнае пераўзбраенне, на мадэрнізацыю, на рэалізацыю новых інвестыцыйных праектаў”.
“Але мы, вядома, прымаем дадатковыя рашэнні, што скіраваныя на ўзмацненне прывабнасці такіх крэдытаў, — дадаў старшыня Нацбанка. — Таму попыт на інвестыцыйныя крэдыты маецца”.
Галоўчанка таксама адзначыў, што Нацбанк арыентуе банкі не проста чакаць, калі да іх “прыйдуць па грошы”, а самім актыўна працаваць з прадпрыемствамі, аказваць неабходную ім арганізацыйную дапамогу.
30 ліпеня стала вядома, што Нацбанк знізіў РВСР на жнівень 2026 года.
Для новых інвестыцыйных крэдытаў, выдадзеных юрыдычным асобам (за выключэннем ільготных), яны зніжаныя з 11,08 да 10,69% гадавых; для новых крэдытаў юрасобам (за выключэннем ільготных, інвестыцыйных) — з 12,26 да 12,00%.
Для новых крэдытаў фізічным асобам (за выключэннем ільготных) — з 17,96 да 17,83%; новых тэрміновых безадзыўных банкаўскіх укладаў (дэпазітаў) фізічных асоб у рублях з тэрмінам вяртання ад 1 да 3 гадоў — з 13,32 да 12,90%, а з тэрмінам вяртання больш за 3 гады — з 14,81 да 14,62%.
Значэнні разліковых велічынь стандартнай рызыкі ў траўні на падставе рашэння НББ засталіся такімі ж, якімі яны былі ў красавіку. На чэрвень паказчыкі былі зніжаныя, на ліпень — зніжаныя асобныя велічыні.
Сістэму мер макрапрудэнцыйнага характару, скіраваную на абмежаванне сістэмнай рызыкі, якая генеруецца бізнес-мадэлямі банкаў з падвышаным рызыка-апетытам, Нацбанк увёў 1 сакавіка 2019 года.
У яе аснове ляжыць падыход, у адпаведнасці з якім да такіх банкаў прымяняюцца падвышаныя рэгуляторныя патрабаванні ў галіне дастатковасці капіталу, фармавання спецыяльных рэзерваў на пакрыццё магчымых стратаў і фармавання фонду абавязковых рэзерваў.
У якасці індыкатара, які паказвае на падвышаны ўзровень рызыкі рэалізуюцца банкамі бізнес-мадэляў, выкарыстоўваецца перавышэнне ўсталяваных працэнтных ставак па новых укладах, крэдытах і эмітаваных аблігацыях над адпаведнымі РВСР. У аснове алгарытму разліку індыкатара ляжыць сярэдняе арыфметычнае, а таксама мера варыяцыі працэнтных ставак, якія бяруцца ў разлік.
1 чэрвеня 2026 года Нацбанк знізіў стаўку рэфінансавання з 9,75 да 9, 25%. Пра гэтае рашэнне было абвешчана 20 траўня.
