Расійскі прапагандысцкі сайт распаўсюдзіў, а потым выдаліў інфармацыю ад імя КДБ Беларусі аб падрыхтоўцы за мяжой правакацыі “супраць краіны”
21 жніўня, Позірк. “Органы дзяржбяспекі атрымалі інфармацыю аб падрыхтоўцы за межамі Беларусі рэзананснай правакацыі, накіраванай супраць інтарэсаў <…> краіны, паведамілі ў КДБ рэспублікі”, — такую інфармацыю распаўсюдзіла 21 жніўня расійскае прапагандысцкае агенцтва “Спутник”.
“Паводле наяўных у распараджэнні беларускіх спецслужбаў звестак, прадстаўнікі радыкальных фарміраванняў, якія знаходзяцца на тэрыторыі Польшчы, пры падтрымцы замежных куратараў абмяркоўваюць магчымыя варыянты правядзення правакацыі супраць Беларусі”, — гаворыцца ў ёй.
Мэтай названа “стварэнне інфаповада, накіраванага на далейшае ўзмацненне палітычнага і санкцыйнага ціску на Беларусь”.
“У КДБ адзначылі, што атрыманая інфармацыя цяпер аналізуецца і правяраецца. Таксама яна перададзена па ўстаноўленых каналах кампетэнтным органам сумежных дзяржаў”, — сказана ў паведамленні.
Сітуацыя “знаходзіцца на кантролі органаў дзяржаўнай бяспекі”: “Прымаюцца неабходныя меры па недапушчэнні пагроз бяспекі грамадзян і дзяржавы”.
Беларускія дзяржСМІ ні пра што такое не паведамляюць.
На працягу паўгадзіны пасля публікацыі навіна была даступная на сайце “Спутник. Беларусь”, яшчэ праз некаторы час — выдаленая.
Пры абнаўленні першапачатковай вэб-старонкі з’яўляецца паведамленне, што яна не знойдзена.
23 ліпеня паведамлялася, што Мінск паінфармаваў Варшаву аб падрыхтоўцы на тэрыторыі гэтай краіны тэрарыстычнага акта.
Беларускі МЗС заявіў, што часоваму паверанаму ў справах Польшчы Кшыштафу Ажане была перададзена інфармацыя, якая паступіла ў ведамства “па лініі праваахоўных органаў Рэспублікі Беларусь адносна падрыхтоўкі тэрарыстычнага акта”.
Сцвярджалася, што тэракт рыхтуецца “асобай, асуджанай у Беларусі па шэрагу артыкулаў Крымінальнага кодэкса, якая была нядаўна пазбаўлена польскімі ўладамі дадатковай абароны і права пражывання ў краіне”.
Мэтай “павінны стаць непаўналетнія дзеці актывісткі, якая жыве ў Польшчы, якая мае беларускае грамадзянства, з меркаванняў помсты за недастатковыя намаганні па захаванні за названай асобай названага вышэй статусу ў Польшчы”.
Польскія спецслужбы не каментавалі гэта, адначасова падкрэсліваючы, што “да ўсёй інфармацыі аб магчымых пагрозах падыходзяць з належнай сур’ёзнасцю”.
Тэму актыўна выкарыстоўвала беларуская дзяржпрапаганда.
Днём пазней у МЗС Беларусі заявілі, што тэракт нібыта рыхтуе “прыхільнік псеўдахрысціянскіх каштоўнасцяў”.
30 ліпеня праўладныя крыніцы абвінавацілі ў падрыхтоўцы да злачынства актывіста Дзяніса Дашкевіча. У якасці ахвяраў згадваліся дзеці дэмакратычнага лідара Святланы Ціханоўскай.
1 жніўня палітык пацвердзіла паступленне пагроз, у тым ліку яе дзецям.
