Сваякі апазналі целы двух альпіністаў, якія загінулі на піку Карумду

27 жніўня, Позірк. Аб апазнанні цел двух альпіністаў, якія загінулі на піку Карумду, паведаміла УУС Ошскай вобласці (Кыргызстан).

Паводле звестак міліцыі, піша сайт 24.kg, загінуўшымі аказаліся 43-гадовы грамадзянін Беларусі Максім Палянскі і 37-гадовы грамадзянін Літвы Сяргей Рубцоў.

Целы знаходзяцца ў моргу абласнога цэнтра. Іх плануецца адправіць на радзіму, гаворыцца ў публікацыі.

Трэці ўдзельнік групы — 60-гадовы грамадзянін Беларусі Мікалай Свірыдаў — пакуль не знойдзены.

26 жніўня праца групы ратавальнікаў на схіле прыпынена на нявызначаны тэрмін: у кулуары каменныя абвалы і лавіны. Усе ратавальнікі вывезены верталётам у Ош. Адзначаецца, што ў выпадку з’яўлення абгрунтаванай версіі, дзе шукаць, аперацыя працягнецца.

Раніцай 16 жніўня пры аблёце схілу робат зняў месца сходу снежна-каменнай масы. Пры разборы запісаў у вынасе, побач са знойдзенымі раней рэчамі, былі знойдзены целы.

Аб выяўленні асабістых рэчаў альпіністаў стала вядома двума днямі раней.

Для пошуку альпіністаў аб’яўляўся дабрачынны збор. На 14 жніўня было ахвяравана 70 тыс. еўра. Збор быў зачынены.

Паведамлялася, што сродкі збіраюцца на арэнду верталёта, працу ратавальнікаў-вышыннікаў, у тым ліку іх дастаўку ў раён пошукаў, а таксама рыштунак, расходныя матэрыялы, акумулятары для дронаў, сродкі сувязі і харчаванне для тых, хто ідзе наверх.

Зніклі інжынер-канструктар з Мінска Максім Палянскі, салігорскі інжынер, кандыдат у майстры спорту па турызме Мікалай Свірыдаў і жыхар Вільнюса Сяргей Рубцоў.

1 жніўня група ў поўным складзе ўзнялася на пік Курумды (Ісык-Кульская вобласць), прайшоўшы маршрут па паўночным грэбні.

Днём пазней мужчыны выйшлі на сувязь апошні раз. Да аўтамабіля, які чакаў іх 4 жніўня, яны не дашлі.

10 жніўня да раёна пошукаў выехала група з прафесійным БПЛА. Паведамлялася, што працаваць робат будзе ў прамежках паміж снегападамі.