КДК прыпыніў працу чатырох гандлёвых аб’ектаў у Брэсце, якія прадавалі пратэрмінаваныя вейпы
1 верасня, Позірк. У Брэсце прыпыненая праца чатырох гандлёвых аб’ектаў па продажы вейпаў і вадкасцяў для іх, паведаміла 1 верасня прэс-служба рэгіянальнага ўпраўлення Камітэта дзяржаўнага кантролю.
Адзначаецца, што падчас праверак былі выяўленыя парушэнні заканадаўства па рэалізацыі вадкасцяў для электронных сістэм курэння і нетытунёвых вырабаў з утрыманнем нікаціну.
У прыватнасці, у продажы былі вадкасці і нетытунёвыя вырабы з утрыманнем нікаціну са скончанымі тэрмінамі прыдатнасці (па шэрагу вырабаў пратэрміноўка перавышала 900 дзён); пакупнікам прапаноўваліся вадкасці з “перавышэннем вызначанай нормы ўтрымання нікаціну”.
Акрамя таго, было высветлена “больш за 70 найменняў вадкасцяў, якія прадаваліся без нанесеных на іх або ўпакоўку ўніфікаваных кантрольных знакаў, а таксама без дакументаў, якія пацвярджаюць якасць і бяспеку гэтай прадукцыі”. Паводле звестак ведамства, гэтая прадукцыя ўвезеная на тэрыторыю Беларусі нелегальна.
Кантрафактная і пратэрмінаваная прадукцыя вынятая з абарачэння.
Узгадненне ў органах дзяржаўнага кіравання праходзіць законапраект, які рэгулюе парадак абарачэння электронных сістэм курэння і прэпаратаў з утрыманнем нікаціну, паведамляла 27 траўня на прэс-канферэнцыі ў Мінску загадчыца аддзялення грамадскага здароўя і сацыяльна-гігіенічнага маніторынгу Рэспубліканскага цэнтра гігіены, эпідэміялогіі і грамадскага здароўя Вольга Бартман.
Дакумент, паводле яе слоў, распрацаваны з улікам небяспекі для здароўя, якую нясуць “электронныя сістэмы курэння і прэпараты з утрыманнем нікаціну”. Спецыяліст, спаслаўшыся на “назапашаны сусветны досвед”, падкрэсліла, што вейпы — гэта “не бяспечная альтэрнатыва курэнню, а небяспечны прадукт”.
Найбольшую занепакоенасць Сусветнай арганізацыі аховы здароўя (СААЗ) у свеце і ў Беларусі выклікае эпідэмія выкарыстання “прадуктаў нікаціну і электронных сістэм дастаўкі нікаціну” сярод дзяцей і падлеткаў, маладых людзей, паведаміў выканаўца абавязкаў кіраўніка краінавага офіса СААЗ у Беларусі Валянцін Русовіч.
Спікер спаслаўся на STEPS-даследаванне па ацэнцы фактараў рызыкі для здароўя насельніцтва (курэнне, алкаголь, лішняя вага), якое праводзіла Міністэрства аховы здароўя сумесна з СААЗ у 2021 годзе.
19 лістапада 2025 года паведамлялася, што згаданы законапраект праходзіць падрыхтоўку да першага чытання ў парламенце.
Дэпутат Палаты прадстаўнікоў Нацыянальнага сходу Алена Хіля паведаміла ў эфіры дзяржаўнага канала СТБ 17 лістапада, што плануецца ўсталяваць жорсткія абмежаванні на дастаўку і продаж вейпаў праз інтэрнэт. Па-за законам будзе дастаўка, перасылка вейпаў і продаж без ліцэнзіі і акцызаў. Пад забарону трапіць самастойнае змешванне вадкасцяў.
17 сакавіка 2025 года паведамлялася, што пасля курэння вейпа ў Дзяржынску (Мінская вобласць) памерла 16-гадовая дзяўчына.
