З 2020 года ў Беларусі ліквідавана не менш за 2.072 НКА — Lawtrend

7 верасня, Позірк. З 2020 года да канца жніўня 2026-га ў Беларусі ліквідавана не менш за 2.072 НКА — аб’яднанняў, прафсаюзаў, фондаў, недзяржаўных устаноў, асацыяцый, вынікае з новага агляду праваабарончай арганізацыі Lawtrend.

На канец ліпеня колькасць ліквідаваных арганізацый складала 2.053, чэрвеня — 2.044, траўня — 2.033, красавіка — 2.022, сакавіка — 2.020, лютага — 2.012, студзеня — 1.995; снежня 2025 года — 1.990, 2024-га — 1.891, 2023-га — 1.509.

Паводле звестак Lawtrend, з 2021 года не менш за 1.264 НКА былі прымусова ліквідаваныя альбо знаходзяцца ў працэсе прымусовай ліквідацыі, яшчэ не менш за 808 прынялі рашэнне аб самастойнай ліквідацыі.

“Асобна працягваецца прымусовая ліквідацыя рэлігійных арганізацый, якія не прайшлі абавязковую перарэгістрацыю да 5 ліпеня 2025 года”, — гаворыцца ў аглядзе.

Канстатуецца, што ў жніўні працягнуліся не толькі “прымусовая і самастойная ліквідацыя некамерцыйных арганізацый“, але і “крымінальны і адміністрацыйны пераслед прадстаўнікоў грамадзянскай супольнасці, прызнанне інфармацыйных рэсурсаў “экстрэмісцкімі матэрыяламі“, а таксама розныя формы ціску на беларускіх актывістаў, якія знаходзяцца па-за межамі краіны“.

“Адначасова, — адзначаюць праваабаронцы, — пашыраецца прымяненне абмежавальнага заканадаўства да формаў калектыўнай актыўнасці, непасрэдна не звязаных з палітычнай дзейнасцю”. У якасці прыкладу паведамляецца, што ў Гродне “патрабаванні заканадаўства аб масавых мерапрыемствах сталі прымяняцца да інтэлектуальна-забаўляльных гульняў (квізаў), якія раней праводзіліся без атрымання адпаведнага дазволу“.

Праваабаронцы звяртаюць увагу, што ў жніўні ўступіла ў сілу новае палажэнне аб публічным абмеркаванні праектаў нарматыўных актаў. На думку Lawtrend, новае рэгуляванне “захоўвае існуючую дыскрэцыйную (на меркаванне арганізатараў абмеркаванняў. — “Позірк”.) мадэль правядзення публічных абмеркаванняў і не забяспечвае большую празрыстасць іх вынікаў”.

“Праект можа быць вынесены на абмеркаванне па рашэнні адпаведнага суб’екта, а фармулёўка “як правіла, падлягаюць публічнаму абмеркаванню“ не стварае безумоўнага абавязку праводзіць абмеркаванне кожнага праекта, нават калі ён істотна закранае правы грамадзян або юрыдычных асоб“, — тлумачыцца ў аглядзе.