ЕС афіцыйна выключыў Гуцэрыева і Шаўцова з санкцыйнага спіса па Беларусі
14 кастрычніка, Позірк. Савет Еўрапейскага саюза выключыў расійскага бізнесмена Міхаіла Гуцэрыева і беларускага прадпрымальніка Віктара Шаўцова са спісу асоб, якія трапляюць пад санкцыі ў сувязі з сітуацыяй у Беларусі.
Адпаведны выканаўчы рэгламент Савета ЕС ад 13 кастрычніка апублікаваны ў Афіцыйным часопісе Еўрапейскага саюза на наступны дзень і набыў моц.
Згодна з дакументам, з раздзела А дадатку I да рэгламенту Савета ЕС № 765/2006, які змяшчае пералік фізічных і юрыдычных асоб, арганізацый і органаў, выключаны дзве пазіцыі: № 125 — Гуцэрыеў і № 258 — Шаўцоў.
Рашэнне прынята “пасля ацэнкі адпаведных абставін па прапанове Вярхоўнага прадстаўніка ЕС па замежных справах і палітыцы бяспекі”.
Рашэнне неафіцыйна анансавалася 6 кастрычніка. Як раней адзначаў “Позірк”, прычынай гэтага паслужылі адпаведныя рашэнні Суда Еўрапейскага саюза (Агульнага суда ЕС).
Пра тое, што Суд Еўрапейскага саюза (Агульны суд ЕС) у Люксембургу ануляваў рашэнне Савета ЕС аб падаўжэнні ў 2025 годзе санкцый у дачыненні да Гуцарыева, стала вядома 13 траўня.
Суд пастанавіў што на момант абнаўлення санкцыйнага спісу ў мінулым годзе ў Савета ЕС не было “дастатковых і актуальных доказаў” падтрымкі ім рэжыму Аляксандра Лукашэнкі.
Пры гэтым выключэнне з беларускага санкцыйнага спісу не азначае зняцця з Гуцэрыева ўсіх абмежаванняў ЕС, паколькі ён таксама знаходзіцца пад санкцыямі Еўрасаюза ў сувязі з расійскай агрэсіяй супраць Украіны.
Гуцэрыеў патрапіў пад санкцыі ЕС у чэрвені 2021 года. Як адзначаў тады Forbes, у рашэнні Рады ЕЗ гаварылася, што ён — “даўні сябар” Лукашэнкі, што дазволіла яму “назапасіць значны капітал і ўплыў сярод палітычнай эліты Беларусі”.
22 красавіка Агульны суд ЕС прызнаў несапраўднымі ўведзеныя Саветам ЕС 26 ліпеня 2024 года і прадоўжаныя на адзін год 24 лютага 2025 года санкцыі ў дачыненні да Шаўцова.
У той жа час, як адзначалася тады ў пастанове суда, яна не тычылася рашэння Савета ЕС ад 26 лютага 2026 года, якая працягнула санкцыі ў дачыненні да Шаўцова да 28 лютага 2027 года.
Пры гэтым выключэнне з беларускага санкцыйнага спісу не азначае зняцця з Гуцэрыева ўсіх абмежаванняў ЕС, паколькі ён таксама знаходзіцца пад санкцыямі Еўрасаюза ў сувязі з расійскай агрэсіяй супраць Украіны.
