13 сусветных дзеячаў культуры, у тым ліку Салман Рушдзі, запатрабавалі ад Лукашэнкі праясніць лёс палітвязняў

15 жніўня, Позірк. Праясніць лёс беларускіх палітвязняў, у тым ліку Марыі Калеснікавай, Віктара Бабарыкі, Максіма Знака і Сяргея Ціханоўскага, запатрабавалі ад Аляксандра Лукашэнкі ў адкрытым лісце 13 сусветных дзеячаў культуры.

“Пан прэзідэнт Лукашэнка, вы забяспечваеце сваю ўладу толькі гвалтам. Поўная ізаляцыя зняволеных — гэта катаванне. Аднак зняволеныя не ваша ўласнасць. Ці звязвае вас яшчэ нешта са словам “чалавечнасць”? Дзе яны?” — гаворыцца ў лісце.

Адзначаючы, што зніклі “дзясяткі іншых палітвязняў”, аўтары пішуць: “Мы глядзім на Беларусь і не перастанем пытацца: дзе знаходзяцца гэтыя людзі?”

Ліст падпісалі лаўрэаты Нобелеўскай прэміі па літаратуры Эльфрыдэ Елінек (Аўстрыя, 2004), Герта Мюлер (Румынія — Германія, 2009), Вольга Такарчук (Польшча, 2018), а таксама пісьменнікі і паэты Салман Рушдзі (Індыя — Вялікабрытанія), Дурс Грунбайн (Германія), Вольф Бірман (Германія), Маргарэт Этвуд (Канада), Томаш Венцлова (Літва), Петэр Надаш (Венгрыя), дырыжор і піяніст Даніэль Барэнбойм (Аргенціна — Ізраіль — Германія), піяністы Ігар Левіт (СССР/Расія — Германія), Андраш Шыф (Венгрыя — Вялікабрытанія) і скрыпач Гідон Крэмер (СССР/Латвія — Германія).

(Выкарыстаны паведамленні faz.net, orf.at, deutschlandfunk.de.)