Польшча заявіла аб выяўленні замежніка, які падазраецца ў шпіянажы на карысць беларускай разведкі

27 сакавіка, BPN. Служба ваеннай контрразведкі (СВК) Польшчы паведаміла аб затрыманні “замежніка, які працаваў на беларускія спецслужбы”.

Гэта адбылося яшчэ 1 сакавіка, гаворыцца ў рэлізе офіса міністра — каардынатара спецыяльных службаў 27 сакавіка.

Як паведамляе ведамства, мужчына, які “працаваў на беларускія спецслужбы”, быў затрыманы “на падставе інфармацыі ваеннай контрразведкі”.

Падазроны ў шпіянажы займаўся разведкай аб’ектаў, “важных для бяспекі Польшчы, у тым ліку звязаных з Узброенымі сіламі”.

“Затрыманаму прад’явілі абвінавачанне ў шпіянажы на карысць беларускай разведкі”, — удакладнілі спецслужбы.

Акруговы суд Любліна санкцыянаваў меру стрымання “ў выглядзе папярэдняга зняволення тэрмінам на тры месяцы”.

Паводле сцвярджэння СВК Польшчы, з пачатку поўнамаштабнага ўварвання Расіі ва Украіну ў 2022 годзе “польскія службы ўжо затрымалі 20 чалавек, якія падазраюцца ў супрацоўніцтве з расійскай або беларускай разведкай”.

Як паведамлялася раней, Агенцтва ўнутранай бяспекі (АУБ) Польшчы затрымала дзевяць замежнікаў па падазрэнні ў супрацоўніцтве з расійскімі спецслужбамі. Згодна з неафіцыйнай інфармацыяй, сярод іх трое грамадзян Беларусі.