На матэрыяльную дапамогу ветэранам і пацярпелым ад наступстваў ВАВ з бюджэту выдзелена 10 млн рублёў

27 красавіка, BPN. Сёлета на матэрыяльную дапамогу ветэранам і пацярпелым ад наступстваў Вялікай Айчыннай вайны з бюджэту выдзелена 10 млн рублёў, паведамляе прэс-служба Міністэрства працы і сацыяльнай абароны са спасылкай на намесніка міністра Марыну Арцёменка.

Дапамогу да Дня перамогі атрымаюць каля 10 тыс. чалавек (летась — каля 14 тыс., у 2020-м да 75-годдзя перамогі — каля 20 тыс.).

Выплаты сёлета будуць рабіцца з 26 красавіка па 4 траўня, іх памер складзе ад 850 да 2.000 рублёў.

Максімальную суму атрымаюць інваліды і ўдзельнікі вайны. Мінімальна магчымую — члены сем’яў ваеннаслужачых, партызан і падпольшчыкаў, якія загінулі і прапалі без вестак у гады ВАВ, а таксама былыя вязні фашысцкіх канцлагераў і іншых месцаў прымусовага ўтрымання, інваліды з дзяцінства з прычыны раненняў, звязаных з баявымі дзеяннямі падчас вайны або з наступствамі ваенных дзеянняў.

З 2022 года ветэранам вайны і асобам, якія пацярпелі ад яе наступстваў, да 9 траўня матэрыяльная дапамога надаецца ў адпаведнасці з указам № 281 ад 21 ліпеня 2021-го “Аб выплаце штогадовай матэрыяльнай дапамогі асобным катэгорыям грамадзян да Дня Перамогі”.