Урад абнуляе экспартныя пошліны на нафту і большасць нафтапрадуктаў

30 снежня, Позірк. Экспартныя пошліны на нафту і большасць нафтапрадуктаў, якія вывозяцца за межы мытнай тэрыторыі Еўразійскага эканамічнага саюза, 1 студзеня 2024 года будуць абнулены, вынікае з пастановы Савета міністраў Беларусі № 989 ад 29 снежня.

Згодна з дакументам, апублікаваным 30 снежня на Нацыянальным прававым інтэрнэт-партале, ўсталяваныя нулявыя стаўкі пошлін на сырую нафту, мазут, нафтавы бітум, вазелін і парафін, адпрацаваныя нафтапрадукты (на 1 снежня — 24,7 долара за тону), прамагонны бензін (13,5), таварныя бензіны, дызельнае паліва, лёгкія, сярэднія дыстыляты, бензол, талуол, ксілолы, алівы (7,4).

Захаваныя, але істотна зніжаныя экспартныя пошліны на звадкаваныя вуглевадародныя газы — 1,6 долара за тону (4,7), а таксама этан, бутан і ізабутан — 1,4 (4,2).

Да снежня ўрад чатыры месяцы запар падвышаў стаўкі пошлін. За гэты перыяд яны павялічыліся ў сярэднім на 69%.

Мінімальныя стаўкі сёлета дзейнічалі ў лютым. Снежаньскія былі вышэйшыя за мінімальныя ў 1,9 раза, сведчыць праведзены “Позіркам” аналіз статданых.

Стаўкі разлічваюцца паводле пэўнай формулы і залежаць ад кошту сыравіны на сусветных рынках. Беларускія пошліны роўныя расійскім (Міністэрства фінансаў РФ яшчэ 15 снежня абвясціла пра абнуленне ставак ад пачатку 2024 года).