Алейнік правядзе перамовы з кіраўніком МЗС Саудаўскай Аравіі

5 студзеня, Позірк. Кіраўнік МЗС Беларусі Сяргей Алейнік 7–8 студзеня наведае з афіцыйным візітам Каралеўства Саудаўская Аравія, “ключавым пунктам парадку дня” стануць поўнафарматныя перамовы з міністрам замежных спраў прынцам Фейсалам бен Фарханам аль-Саўдам, паведаміла прэс-служба знешнепалітычнага ведамства.

“Праграмай візіту таксама запланаваны шэраг сустрэч беларускай дэлегацыі ў міністэрствах, ведамствах і з прадстаўнікамі дзелавых колаў Саудаўскай Аравіі. Будуць абмеркаваны актуальныя пытанні двухбаковага і шматбаковага парадку дня з акцэнтам на гандлёва-эканамічнае ўзаемадзеянне, умацаванне палітычных сувязей, далейшае развіццё дагаворна-прававой базы”, — гаворыцца ў рэлізе.

Асобнымі тэмамі перамоваў, як паведамляецца, стануць “харчовая бяспека, сітуацыя ў рэгіёне і свеце ў цэлым”.

У лістападзе мінулага года ў Беларусі ўпершыню за 26 гадоў з моманту ўстанаўлення дыпламатычных адносін быў акрэдытаваны ваенны аташэ Саудаўскай Аравіі, ім стаў стаў генерал-маёр Саад Махамед Хасейн Алькаціры.

У пачатку ліпеня мінулага года Алейнік абмяркоўваў з намеснікам кіраўніка МЗС Саудаўскай Аравіі Валідам аль Херыжы пытанні актывізацыі турызму і аблягчэння візавага рэжыму паміж краінамі.