Напад на любую саюзную дзяржаву будзе лічыцца нападам на Беларусь — прадстаўнік Генштаба
21 студзеня, Позірк. У выпадку ўцягвання ў ваенныя канфлікты, якія класіфікуюцца ваеннай дактрынай Беларусі (ВД), як “міждзяржаўныя і міжкааліцыйныя”, афіцыйны Мінск “будзе вымушаны ў іх удзельнічаць і прымяняць ваенную сілу”, заявіў 21 студзеня ў эфіры СТБ начальнік інфармацыйна-аналітычнага ўпраўлення Генеральнага штаба Узброеных сіл Беларусі Арцём Буторын.
“Што тычыцца нашых саюзніцкіх адносін, асобны раздзел з’явіцца ў нашай ваеннай дактрыне <…>: напад на любую саюзную дзяржаву будзе лічыцца нападам на Рэспубліку Беларусь, — удакладніў Буторын. — Плюс да гэтага < … > будуць замацаваныя асновы нашага стаўлення да міратворчай дзейнасці пад эгідай <…> ААН і АДКБ”.
Паводле слоў прадстаўніка Генштаба, у ВД “даводзіцца, што з’яўленне на нашай тэрыторыі ядзернай зброі з’яўляецца вымушанай мерай <…> стратэгічнага стрымлівання, накіраванай на прадухіленне канфлікту”.
“Што тычыцца парадку прымянення ядзернай зброі — гэта не прадмет Ваеннай дактрыны”, — сказаў Буторын.
Абноўленая Ваенная дактрына была разгледжаная 16 студзеня ў рамках абмеркавання Канцэпцыі нацыянальнай бяспекі на пасяджэнні Савета бяспекі з удзелам Аляксандра Лукашэнкі.
Рашэнне аб распрацоўцы праекта новай ВД было прынята пасля адабрэння новай рэдакцыі Канцэпцыі нацбяспекі ў лютым 2023 года.
У дакуменце раскрыты змест ваеннай палітыкі краіны. У прыватнасці, сцвярджаецца, што “Беларусь — міралюбная краіна, нікому не пагражае, але спробы ўмяшання ва ўнутраныя справы, а тым больш пагроза прымянення ваеннай сілы або агрэсія будуць спыняцца з выкарыстаннем усяго патэнцыялу дзяржавы”.
Пасля адабрэння Саветам бяспекі праектаў канцэпцыя і дактрына будуць вынесены на зацвярджэнне Усебеларускага народнага сходу.
Гл. таксама: