Прыгавор рэдактару “Рэгіянальнай газеты” Манцэвічу пакінуты без змен — 4 года зняволення

23 студзеня, Позірк. Прыгавор рэдактару “Рэгіянальнай газеты” Аляксандру Манцэвічу — 4 гады пазбаўлення волі — пакінуты без зменаў. Адпаведнае рашэнне 23 студзеня прыняў Мінскі абласны суд пасля разгляду апеляцыйнай скаргі, паведамляе праваабарончы цэнтр “Вясна”.

3 лістапада 2023 года суд Маладзечанскага раёна (суддзя Сяргей Іршын) прызнаў Манцэвіча вінаватым паводле арт. 369¹ КК (дыскрэдытацыя Беларусі). Акрамя таго, галоўны рэдактар медыя быў аштрафаваны на 400 базавых велічыняў (на той момант 14.800 рублёў).

Абвінавачанне сцвярджала, што Манцэвіч, з’яўляючыся дырэктарам рэдакцыі газеты, сумесна з іншымі асобамі з 1 студзеня 2020 года па 15 сакавіка 2023 года нібыта “распаўсюджваў у друкаваным выданні і яго інтэрнэт-рэсурсах загадзя ілжывыя звесткі, якія дыскрэдытуюць Беларусь і яе органы ўлады”.

Мужчына не прызнаў віну.

“Рэгіянальная газета” выдавалася з 1995 года, пісала пра падзеі ў сямі раёнах Мінскай і Гродзенскай абласцей — Маладзечанскім, Мядзельскім, Вілейскім, Смаргонскім, Валожынскім, Ашмянскім і Астравецкім.

У 2020-м газета паведамляла пра пратэсты у рэгіёне, дзеянні міліцыі.

19 ліпеня 2021 года сілавікі прыйшлі ў рэдакцыю з вобшукам. Манцэвіча з жонкай, а таксама журналістак Зою Хруцкую і Анастасію Уткіну забралі на допыт. Іх адпусцілі ў той жа дзень, але ў медыя забралі ўсю тэхніку. 22 ліпеня рэдакцыя абвясціла, што спыняе выпуск газеты (раней гандлёвыя сеткі адмовіліся яе прадаваць), але працягнула працу на сайце і ў сацыяльных сетках.

У 2022 годзе Міністэрства інфармацыі прызнала “экстрэмісцкімі матэрыяламі” 15 артыкулаў “Рэгіянальнай газеты”, у 2023-м — увесь кантэнт яе сайта і сацсетак.

15 сакавіка 2023 года Манцэвіча затрымалі дома ў Вілейцы.

Паводле даных Беларускай асацыяцыі журналістаў, цяпер у няволі знаходзяцца 34 прадстаўнікі беларускіх медыя.