Грамадзяне не будуць спрабаваць абыходзіць “падатак на багацце”, лічыць прадстаўнік адміністрацыі Лукашэнкі

19 кастрычніка, Позірк. Прагрэсіўная шкала падаткаабкладання не з’яўляецца жорсткай, “будзе працаваць лепш, чым любыя іншыя спосабы кантролю з боку падатковых органаў”, і не справакуе спроб бізнесу і грамадзян абыходзіць павышаныя падаткі. Такое меркаванне выказаў намеснік кіраўніка адміністрацыі Аляксандра Лукашэнкі Максім Ермаловіч у праграме “Эканамічнае асяроддзе” на тэлеканале “Беларусь 1”.

Як лічыць Ермаловіч, “лепш заплаціць гэтую частку падатку, яна не такая вялікая, і спакойна жыць, не прыцягваючы да сябе ўвагу падатковых органаў”, чым шукаць “нейкія варыянты, схаваць ды абысці звышпрыбыткі, дзесьці іх схаваць, атрымаць іх у канверце і потым думаць, як іх легалізаваць дзеля таго, каб аплаціць нейкія паслугі ці тавары ці набыць дарагую нерухомасць”.

Праект закона аб змяненні Падатковага кодэкса прадугледжвае дыферэнцыраваную стаўку падаходнага падатку для індывідуальных прадпрымальнікаў і натарыусаў, а таксама фізічных асоб у залежнасці ад іх даходаў.

Раней у гэтай жа праграме Ермаловіч зазначыў, што “плацельшчыкамі падатку па павышанай стаўцы становяцца нашы грамадзяне і падатковыя рэзідэнты, сярэднямесячныя даходы якіх складаюць больш за 16,6 тыс. беларускіх рублёў”. “Гэта значыць нават людзі, якія атрымліваюць заработную плату ў 16 тыс. рублёў, усё яшчэ будуць выплачваць падатак па стандартнай стаўцы”, — сказаў ён.

Падвышаны падатак, адзначыў чыноўнік, будзе выплачвацца ад перавышэння гадавой сумы 200 тыс. рублёў: “Калі сума складзе 210 тыс., падаткаплацельшчыку будзе неабходна заплаціць падатак па падвышанай стаўцы з 10 тыс., пры гэтым з 200 тыс. падатак будзе выплачвацца па стандартнай стаўцы 13%”.