Дарадца Ціханоўскай Ворыхава абраная ў Кансультатыўны савет па справах моладзі СЕ

20 лютага, Позірк. Еўрапейскі моладзевы форум 19 лютага ў Страсбургу (Францыя) абраў дарадцу Святланы Ціханоўскай па моладзевай палітыцы і студэнцтву Маргарыту Ворыхаву прадстаўніцай Беларусі ў Кансультатыўным савеце па справах моладзі Савета Еўропы, паведамляе прэс-служба дэмакратычнага лідара.

“Мая задача — абараняць інтарэсы маладых людзей з Еўропы і, вядома, з Беларусі, — прыводзяцца ў паведамленні словы Ворыхавай. — Галоўная мэта — заручыцца поўнай падтрымкай з боку дзяржаў —членаў СЕ ў імкненні Беларусі да дэмакратыі. Для нас гэта будзе значыць узмацненне падтрымкі беларусаў і беларусак на міжнароднай арэне”.

У рэлізе адзначаецца, што гэта першы выпадак, калі грамадзянін Беларусі атрымаў прадстаўніцтва ў гэтай структуры СЕ. Яна складаецца з 30 прадстаўнікоў моладзевых арганізацый і НДА.

Асноўная мэта Кансультатыўнага савета — вырашаць пытанні, звязаныя з моладдзю, распрацоўваць рэкамендацыі для дзяржаў Савета Еўропы, а таксама кансультаваць Камітэт міністраў СЕ.

Гл. таксама:

Дарадца Ціханоўскай: Стаўленне ўладаў да беларускай моладзі — тупіковае

Дарадца Ціханоўскай папярэдзіла пра новую “пагрозу інтэлектуальнай свабодзе моладзі”