Прадстаўнік МУС заявіў у Жэневе, што дасягнуты ў Беларусі тэмп зніжэння траўматызму пры ДТЗ — адзін з лепшых у свеце

21 лютага, Позірк. Дасягнуты ў Беларусі тэмп зніжэння дарожна-транспартнага траўматызму — “адзін з лепшых у свеце”, заявіў намеснік начальніка ГУ ДАІ Міністэрства ўнутраных спраў Віктар Ротчанкаў у Жэневе (Швейцарыя) на 86-й сесіі Камітэта па ўнутраным транспарце Еўрапейскай эканамічнай камісіі ААН, паведамляе прэс-служба МУС.

Ротчанкаў акцэнтаваў увагу на значным паляпшэнні дарожнай абстаноўкі ў Беларусі за апошнія 15 гадоў. Ён адзначыў, што ў краіне прымаюцца практычныя меры для павышэння бяспекі на дарогах, абазначыў зацікаўленасць у абмене вопытам з замежнымі калегамі.

У 2023 годзе на дарогах Беларусі загінулі 434 чалавекі, менш за ўсё за ўсю гісторыю вядзення ўліку (у 2022 годзе — 466), паведаміў у студзені начальнік Дзяржаўтаінспекцыі Вадзім Гаркун.

Згодна з данымі, прыведзенымі ў актуальнай Канцэпцыі забеспячэння бяспекі дарожнага руху, з 2013 па 2022 год у Беларусі адбылося 37.625 ДТЗ, у якіх загінула 6.111 чалавек, атрымалі раненні — больш за 39 тыс. У канцэпцыі вызначана задача не дапусціць, каб да 2025 года паказчык гібелі ДТЗ перавышаў 450 чалавек у год, да 2030 года — 400.

У краінах ЕС паказчык загінулых у ДТЗ лічыцца на мільён насельніцтва.

Паводле даных тэлеканала “Еўраньюс” на чэрвень 2023 года, у ЕС па гэтым паказчыку ў 2023 годзе горш за ўсё ішлі справы ў Румыніі (93), Балгарыі (81) і Латвіі (78). На Мальце зарэгістравана 17 загінуўшых у ДТЗ на мільён чалавек, у Нарвегіі — 15, у Германіі — 31, у Аўстрыі — 41, у Чэхіі — 50, у Польшчы — 59.

У Беларусі ў 2023 годзе гэты паказчык склаў каля 47 (паводле звестак Белстата, на 1 студзеня 2023 года ў краіне пражывала 9.200.617 чалавек). У пачатку 2022-га ў краіне было 9.255.524 жыхары, адпаведна, паказчык загінулых на мільён складаў 50, сведчаць разлікі “Позірку”.