На складах “замарожана” прампрадукцыі амаль на 9 млрд рублёў

23 лютага, Позірк. Запасы гатовай прамысловай прадукцыі на складах на 1 лютага 2024 года склалі 8 млрд 959 млн 749 тыс. рублёў, паведамляе Нацыянальны статыстычны камітэт.

За студзень адносна снежня 2023-га запасы павялічыліся на 7,75% (з 8 млрд 315 млн 652 тыс.), у гадавым вымярэнні — на 3,34% (8 млрд 670 млн 320 тыс.).

Паводле звестак Белстата, суадносіны запасаў і сярэднямесячнага аб’ёму вытворчасці ў студзені 2024-га склалі 69,6%, у студзені і снежні 2023-га — 75,2% і 65,8% адпаведна.

На прэс-канферэнцыі 18 верасня 2023 года першы намеснік міністра прамысловасці Аляксандр Агароднікаў заявіў, што беларуская прадукцыя “з’яўляецца складанатэхнічнай”, яе “няпроста рэалізаваць”, “трэба прадаваць з сервісным суправаджэннем, з навучаннем персаналу сервісу”.

“Склад — гэта дрэнна з пункту гледжання замарожаных актываў, з другога боку — гэта магчымасць рэалізаваць сваю прадукцыю патэнцыйнаму спажыўцу”, — сказаў чыноўнік.

Паводле звестак Белстата, у студзені 2024 года аб’ём прамысловай вытворчасці ў бягучых цэнах склаў 15,6 млрд рублёў (+5,4% да першага месяца 2023-га).