Намеснік міністра абароны: Спецыяльная ваенная аперацыя для нас з’яўляецца ў нейкай ступені падручнікам

29 лютага, Позірк. “У спецыялістаў ПВК “Вагнер” ёсць уласная сістэма баявой падрыхтоўкі, і яны, зыходзячы са сваіх магчымасцей, аказваюць нам дапамогу”, — заявіў у інтэрв’ю выданню Адміністрацыі прэзідэнта sb.by намеснік міністра абароны Андрэй Жук.

“Артылерысты, танкісты, мотастралкі, аператары БПЛА, зенітчыкі — усе тыя, хто прымаў удзел у баявых дзеяннях, перадаюць вопыт нашым вайскоўцам”, — сказаў ён.

Паводле слоў прадстаўніка ведамства, навучанне праходзяць не толькі вайскоўцы воінскіх часцей, але і выкладчыкі ведамасных вышэйшых навучальных устаноў, “каб перадаць атрыманыя веды курсантам, студэнтам, тым, хто вучыцца па праграмах афіцэраў запасу”.

“Спецыяльная ваенная аперацыя для нас з’яўляецца ў нейкай ступені падручнікам. З яго мы бярэм інфармацыю чаму і як вучыць вайскоўцаў. Але гэта размова аб сённяшнім дні, — дадаў ён. — Ведаеце, гавораць, генералы заўсёды рыхтуюць да мінулай вайны, а мы стараемся думаць на перспектыву і дзейнічаць на апярэджанне”.

Тэрмінам “спецыяльная ваенная аперацыя” расійскія і беларускія ўлады называюць поўнамаштабную вайну супраць Украіны, развязаную РФ у лютым 2022 года.

Афіцыйны Мінск падтрымлівае расійскую агрэсію ва Украіне, якая з’яўляецца найбуйнейшым ваенным канфліктам у Еўропе з часоў Другой сусветнай вайны. Беларускія ўлады далі арміі РФ тэрыторыю для нападу на суседнюю краіну зімой і вясной 2022 года, а затым на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў.

9 лютага тэлеграм-канал унутраных войскаў МУС паведаміў аб завяршэнні шостага сезона курсу тактыка-спецыяльнай падрыхтоўкі ваеннаслужачых спецпадраздзяленняў унутраных войскаў з удзелам ПВК “Вагнер”.