17 сакавіка, Позірк. У 19 раёнах Беларусі абмежаванае наведванне лясоў, паведамляе прэс-служба Міністэрства лясной гаспадаркі.
“Меры абмежавальнага характару пакуль не закранулі толькі Гродзенскую вобласць. Клас пажарнай небяспекі ў многіх рэгіёнах вырас да трэцяга”, — гаворыцца ў паведамленні.
У Брэсцкай вобласці абмежаванні ўведзеныя ў Камянецкім раёне, у Віцебскай — у Віцебскім і Лепельскім, у Гомельскай — у Рэчыцкім і Акцябрскім, у Магілёўскай — у Асіповіцкім, Глускім, Бабруйскім, Круглянскім, Клічаўскім, Кіраўскім, Быхаўскім і Бялыніцкім, у Мінскай — у Салігорскім, Пухавіцкім, Чэрвеньскім, Бярэзінскім і Барысаўскім.
Абмежаваны ўезд транспарту ў лес. Адпаведныя рашэнні прыняты райвыканкамамі. Мера носіць часовы характар.
З пачатку пажаранебяспечнага сезона ў лясным фондзе Мінлясгаса адбылося восем узгаранняў.
