Больш за 30 тыс. польскіх вайскоўцаў прайшлі падрыхтоўку па ахове мяжы з Беларуссю — Мінабароны

6 красавіка, Позірк. Больш за 30 тыс. вайскоўцаў польскай арміі прайшлі падрыхтоўку па ахове мяжы з Беларуссю, паведаміў на прэс-канферэнцыі 5 красавіка міністр нацыянальнай абароны гэтай краіны Уладзіслаў Касіняк-Камыш.

Міністр звярнуўся са словамі падзякі да “больш за 30 тысяч салдат, якія прайшлі не толькі праз ахову мяжы, але і надзвычай складаны кампанент вучэнняў” (цытата паводле відэа TVP Info).

“Праз ваенную аператыўную групу, створаную для забеспячэння аховы мяжы [з Беларуссю] і падтрымкі службы аховы мяжы, прайшло больш за 30 тыс. вайскоўцаў [Польскай арміі], — заявіў кіраўнік ведамства. — Несумненна, гэта гіганцкія намаганні 18-й дывізіі, якая з самага пачатку ўзяла на сябе місію па падтрымцы памежнікаў у забеспячэнні бяспекі мяжы”.

Паводле яго слоў, дзяржава мае намер інвеставаць каля 850 млн злотых (каля 215 млн долараў) у 2024 годзе ў “ваенную аператыўную групу па ахове мяжы Падляшша”. Гэта “самая буйная сума за ўсе гады”, дадаў ён.

“Мы інвестуем не толькі ў перыметр, а менавіта ў прысутнасць вайскоўцаў і памежнікаў, якія абараняюць мяжу. Адной толькі лічбавай бяспекі недастаткова, павінна быць прысутнасць памежнікаў і вайскоўцаў Польскай арміі. Іх задача — падтрымліваць службу аховы мяжы. Калі яе непранікальнасцю займаюцца памежнікі, то Польскае войска <…> клапоціцца аб непарушнасці межаў дзяржавы”, — падкрэсліў Касіняк-Камыш.

У сакавіку міністр заявіў аб планах павялічыць колькасць узброеных сіл на ўсходніх граніцах краіны для садзейнічання пагранічнай службе ў іх ахове.

21 сакавіка намеснік міністра абароны Польшчы Цэзарый Томчык паведаміў, што з ліпеня 2021 года да аховы мяжы прыцягнута 5,6 тыс. вайскоўцаў; у 2022-м — 6,7 тыс.; у 2023-м — 3 тыс., з пачатку 2024-га — 4,6 тыс. За гэты перыяд “было выстаўлена 280 тыс. назіральных пастоў і арганізавана больш за 250 тыс. патрулёў”.

У чэрвені 2023 года Польшча завяршыла ўзвядзенне 206-кіламетровага плота ўздоўж мяжы з Беларуссю.

16 лютага гэтага года прэм’ер-міністр Дональд Туск заявіў, што загарода павінна быць мадэрнізавана “ў самыя кароткія тэрміны”.

За тры дні красавіка краіны ЕС спынілі 743 спробы пранікнення нелегалаў з Беларусі, што на трэць больш, чым за студзень і люты.

3 красавіка пагранслужбы краін ЕС прадухілілі 254 спробы нелегальнага перасячэння мяжы з боку Беларусі, у тым ліку ў Польшчу 191.

Міграцыйны крызіс на граніцы Беларусі і краін ЕС прадаўжаецца з вясны 2021 года.