Мытня Літвы: Аўтамабіль, які загарэўся на мяжы з Беларуссю, перавозіў кантрабандныя цыгарэты

18 красавіка, Позірк. Аўтамабіль Porsche Cayenne, які загарэўся ў ангары Вільнюскай тэрытарыяльнай мытні на пункце пропуску Мядзінінкай (з беларускага боку Каменны Лог) у ноч на 18 красавіка, перавозіў кантрабандныя цыгарэты, заявіла прадстаўніца Мытнага дэпартамента Літвы Ірміна Фралова-Мілашэне.

Схованка з цыгарэтамі была знойдзеная ў аўтамабілі пры даглядзе.

Як паведамляе партал навінаў Delfi, у выніку ўзгарання пацярпеў літоўскі мытнік, ён атруціўся чадным газам.

Паведамленне пра пажар паступіла ў экстранныя службы ў 2:40 18 красавіка. Агонь быў патушаны ў 6:49. У яго выніку згарэў аўтамабіль, даглядальны ангар і частка адміністрацыйнага будынка.

Паводле інфармацыі Дзяржпагранкамітэта Беларусі, цяпер літоўскі бок ужо афармляе ў Мядзінінкаі транспарт, які ідзе ў Беларусь. Пропуск аўтамабіляў з беларускай тэрыторыі пакуль не ажыццяўляецца.

17 красавіка стала вядома, што ў сярэдзіне траўня Літва можа закрыць пункт пропуску Шальчынінкай (Беняконі).

18 жніўня 2023 года Літва закрыла пункты пропуску Шумскас (Лоша) і Твярачус (Відзы), 1 сакавіка 2024-га — Лаварышкес (Катлоўка) і Райгардас (Прывалка). На мяжы з Беларуссю працягваюць працаваць два памежныя пераходы — Мядзінінкай і Шальчынінкай.