Да выбараў у Каардынацыйную раду дапушчана 12 спісаў з 265 кандыдатамі

25 красавіка, Позірк. Пасля верыфікацыі да выбараў у Каардынацыйную раду (КР) дапушчана 12 спісаў, якія агулам налічваюць 265 кандыдатаў. Колькасны склад спісаў і дадзеныя ім парадкавыя нумары тэлеграм-канал КР апублікаваў 25 красавіка пасля агульнага пасяджэння выбарчай камісіі.

Такім чынам, у выбарах будуць удзельнічаць наступныя спісы:

1. “Салідарнасць” — 21 чалавек (лідары спісу — прадстаўнік групы хрысціянскіх дэмакратаў Георгій Дзмітрук, в.а. старшыні партыі “Народная грамада” Яўген Вільскі),
2. “Воля” — 20 (намеснік камандзіра палка імя Кастуся Каліноўскага Вадзім Кабанчук),
3. “Еўрапейскі выбар” — 34 (старшы палітычны дарадца дэмакратычнага лідара Святланы Ціханоўскай Аляксандр Дабравольскі; першапачаткова ў спісе было 37 чалавек),
4. “Наша справа” — 14 (палітолаг Роза Турарбекава),
5. “Закон і Правапарадак” — 20 (кіраўнік арганізацыі ByPol Аляксандр Азараў),
6. “Голас дыяспар — Адзінства па-над межамі” — 13 (лідар беларускай дыяспары ў Сан-Францыска Надзея Нортан, раней спіс прадстаўляў праваабаронца Раман Кісляк),
7. “Незалежныя беларусы” — 17 (відэабалогер Максім Шабуцкі),
8. “Блок Пракоп’ева — Ягорава” — 34 (адзін з заснавальнікаў беларускага добраахвотніцкага палка “Пагоня”, былы рэстаратар Вадзім Пракоп’еў і дзейны старшыня КР Андрэй Ягораў; раней спіс налічваў 35 чалавек),
9. “Каманда Латушкі і Рух “За свабоду” — 46 (намеснік кіраўніцы Аб’яднанага пераходнага кабінета Павел Латушка і яго намеснік па кадравых пытаннях, лідар руху Юрась Губарэвіч; першасна ў спісе было 47 чалавек),
10. “Хопіць баяцца” — 14 (аўтар аднайменнага медыяпраекта, відэаблогер Таццяна Мартынава),
11. “Краіна для жыцця” — 17 (кіраўнік аднайменнага грамадскага руху Віталь Савюк),
12. “Моладзевы наступ” — 15 (актывістка “Моладзевага блока” Лізавета Пракопчык).

У рэгістрацыі адмовілі спісу “За годнасць беларусак”, дзе было 10 кандыдатаў на чале з кіраўніком віленскага аддзялення “Руху беларускіх нацыяналістаў” Яраславам Грыгор’евым.

Варта адзначыць, што сход “часткі асабовага складу” палка імя Кастуся Каліноўскага раней дазволіў байцам “рэалізоўваць ўласныя палітычныя інтарэсы” выключна ў якасці фізічных асоб — пры ўмове сыходу з вайсковай адзінкі.

Выбары ў Каардынацыйную раду пачнуцца 25 траўня і працягнуцца 3 дні — да 23:59 27 траўня. Першае пасяджэнне КР трэцяга склікання чакаецца 15 чэрвеня.