Суполка “Мы не Холопы” стала 200-м “экстрэмісцкім фарміраваннем”

2 траўня, Позірк. Міністэрства ўнутраных спраў 2 траўня прызнала “экстрэмісцкім фарміраваннем” групу грамадзян “з ліку стваральнікаў, адміністратараў і іншых удзельнікаў інтэрнэт-рэсурсаў пад агульнай назвай “Мы не Холопы”.

Адпаведная інфармацыя ўнесеная ў абноўлены пералік на сайце МУС 2 траўня.

Іншай назвай “фарміравання”, як паказана ў спісе, з’яўляецца “Олег Желнов”.

Да “фарміравання” ведамства аднесла ютуб-каналы “Мы не Холопы”, аднайменныя старонкі ў “Інстаграме”, “Фэйсбуку”, Х, “УКантакце”, “Аднакласніках”, канал, чат і боты ў “Тэлеграме”, адрасы электроннай пошты, а таксама ўліковыя запісы на платформах Boosty і Donation Alerts.

Таксама “экстрэмісцкім” прызнаны лагатып “у выглядзе мастацкага малюнка сціснутай у кулак кісці рукі са стужкай бел-чырвона-белага колеру”.

Суполка “Мы не Холопы” стала 200 “экстрэмісцкім фарміраваннем” у вышэйзгаданым пераліку. Першае “фарміраванне” з’явілася 21 верасня 2021 года.