Вялікабрытанія і ЗША запатрабавалі ад Беларусі перастаць рэпрэсаваць журналістаў
4 траўня, Позірк. “Беларускі рэжым павінен спыніць варожыя дзеянні супраць незалежных СМІ”, — заявіла брытанскі міністр па справах Еўропы Нус Гані з нагоды Сусветнага дня свабоды прэсы (3 траўня).
Як паведамляе амбасада Вялікабрытаніі ў Беларусі, яна салідарызавалася з “мужнымі беларускімі журналістамі, змешчанымі ў турму за пошук праўды”, а таксама вітала “тых, хто працягвае даносіць важную інфармацыю ў выгнанні, нягледзячы на неспрыяльную сітуацыю”.
Дыпламатычнае прадстаўніцтва Злучаных Штатаў Амерыкі ў Мінску з той жа нагоды адзначыла, што ў сучасным свеце “свабодная прэса мае вырашальнае значэнне для свабоднага і дэмакратычнага грамадства”.
“Мы выказваем падзяку журналістам і работнікам сродкаў масавай інфармацыі, якія імкнуцца да большай падсправаздачнасці, празрыстасці і інфармаванасці грамадства, — гаворыцца ў паведамленні. — У Беларусі і ў іншых краінах яны часта працуюць перад абліччам пераследу і гвалту. Усе беларускія журналісты, якія імкнуліся да дэмакратыі і празрыстага асвятлення падзеяў, павінныя быць неадкладна вызваленыя”.
У сваю чаргу дзяржаўны сакратар ЗША Энтані Блінкен заявіў, што “свабодны паток дакладнай інфармацыі, ідэй і меркаванняў <…> неабходны для празрыстага, адказнага кіравання, у якое ўцягнутыя ўсе бакі”.
“У сваім імкненні да праўды журналісты сутыкаюцца з беспрэцэдэнтнай небяспекай толькі за тое, што выконваюць сваю працу, — канстатаваў кіраўнік амерыканскай дыпламатыі. — У 2023 годзе было забіта больш журналістаў, чым за любы іншы год за апошні час”.
“Аўтарытарныя ўрады і недзяржаўныя суб’екты працягваюць выкарыстоўваць дэзінфармацыю і прапаганду, каб сарваць абмен меркаванняў у грамадстве і перашкодзіць намаганням журналістаў па інфармаванні грамадскасці, прыцягненню ўрадаў да адказнасці і раскрыццю праўды”, — падкрэсліў ён.
Блінкен заклікаў усе краіны “рабіць больш для абароны журналістаў” і ў чарговы раз заявіў пра “нязменную падтрымку” ЗША “вольных і незалежных СМІ па ўсім свеце”.
Беларусь апусцілася на 10 пазіцый у індэксе свабоды прэсы "Рэпарцёраў без межаў"
3 траўня, Позірк. Беларусь заняла 167-е месца ў Сусветным індэксе свабоды прэсы 2024 года, які склала міжнародная арганізацыя "Рэпарцёры без межаў" (RSF). Беларусь знаходзіцца паміж Саудаўскай Аравіяй і Кубай. У індэксе-2023 Беларусь займала 157-е месца, у 2022 годзе — 153-е. …
Вонкавы ціск на ўлады Беларусі можа паўплываць на сітуацыю з журналістамі ў няволі, лічыць Бастунец
3 траўня, Позірк. Да сённяшняга дня медыясектар у Беларусі прыйшоў у вельмі дрэнным стане, такое меркаванне выказаў "Позірку" старшыня Беларускай асацыяцыі журналістаў (БАЖ) Андрэй Бастунец. У Сусветны дзень свабоды прэсы, 3 траўня, кіраўнік БАЖ разам з беларускімі і літоўскімі калегамі ўзяў удзел у акцыі …
