Па справе аб вярбоўцы Украінай падлеткаў затрымана чатыры чалавекі — Алейнік

6 траўня, Позірк. У межах крымінальнай справы аб вярбоўцы Украінай падлеткаў у Беларусі затрымана чатыры чалавекі, заявіў міністр замежных спраў Сяргей Алейнік у інтэрв’ю расійскаму інфармацыйнаму агенцтву “РИА Новости”.

“Літаральна нядаўна… Была выяўленая група студэнтаў, якія былі завербаваныя спецслужбамі Украіны для падрыхтоўкі і здзяйснення тэрарыстычных актаў. І, натуральна, зараз гэтаму даецца адпаведная крымінальна-працэсуальная ацэнка. Вядуцца следчыя дзеянні”, — цытуе чыноўніка СМІ 6 траўня.

Пра затрыманне непаўналетніх за падрыхтоўку тэрактаў у Беларусі нібыта па заданні Службы бяспекі Украіны паведамлялася ў фільме “Дзеці на прыцэле. Завербаваныя ворагам”, які выйшаў 29 красавіка на дзяржаўным тэлеканале ОНТ.

Дакладная колькасць затрыманых з матэрыялаў не была зразумелая.

У прыватнасці, у фільме паказаны Данііл Гарасім, які знаходзіцца ў ізалятары, 2005 года нараджэння. Сцвярджаецца, што ён пісаў у чат-бот палка Каліноўскага і нібыта збіраўся адправіцца на вайну ва Украіне.

Яго вінавацяць паводле ч. 1 арт. 356 (здрада дзяржаве).

Акрамя таго, дэманстравалася 16-гадовая грамадзянка Украіны Марыя Місюк, якая ўтрымлівалася ў ізалятары, абвінавачаная па крымінальнай справе аб тэрарызме.

У тэрарыстычную арганізацыю, як сцвярджаецца, уваходзіла яшчэ пяцёра непаўналетніх: Трафім Барысаў, Зміцер Захарошка, Анастасія Кліменка, Аляксандра Пуліновіч і Сяргей Жыгалёў. Паказаны кадры інтэрв’ю з Барысавым і Жыгалёвым у ізалятары.

Таксама прадэманстравана гутарка з 16-гадовым жыхаром Магілёва Станіславам, які знаходзіцца ў месцах несвабоды (прозвішча вымаўлена неразборліва). Казалася, што ён нібыта быў завербаваны СБУ.