8 траўня, Позірк. Красавік 2024 года апынуўся сярод рэкардсменаў па тэмпературы і ападках, сведчыць праведзены “Позіркам” аналіз месячнага агляду Белгідрамета.
Сярэдняя тэмпература перавысіла норму на 2,3 градуса і склала 10,1 градуса цяпла. Гэта трэці паказчык сярод красавікоў пасля 1945 года.
Найбольшае станоўчае адхіленне тэмпературы паветра ад кліматычнай нормы адзначана ў Магілёўскай вобласці (2,6 градуса), найменшае — у Мінскай (1,9).
Найцяплейшай была першая дэкада з сярэдняй тэмпературай 12,1 градуса (на 6,7 градуса вышэй за норму). У другой дэкадзе пахаладала, але ўсё роўна было цяплей за норму (8,7 супраць 7,5). У трэцяй дзесяцідзёнцы тэмпература трохі павысілася, аднак апынулася ўжо ніжэй за норму (9,5 супраць 10,5).
Максімальная тэмпература паветра адзначана ў Жыткавічах 2 красавіка — 28,2 градуса. У Езярышчы абноўлены гістарычны месячны максімум тэмпературы паветра (26,8 градуса 10 красавіка супраць 26,7 — 29 красавіка 2012 года).
Мінімальная тэмпература зарэгістраваная ў Бабруйску 5 красавіка (-2,7).
За месяц выпала ў сярэднім 85 мм ападкаў (85 л вады на квадратны метр тэрыторыі), што склала 218% кліматычнай нормы. Красавік 2024 года заняў другое месца ў шэрагу назіранняў ад самага вільготнага да самага сухога, пачынаючы з 1945 года. На большай частцы тэрыторыі выпала ад двух да трох месячных нормаў. На асобных метэастанцыях Віцебскай, Мінскай і Гомельскай абласцей абноўлены гістарычныя месячныя і сутачныя максімумы ападкаў.
Больш за ўсё ападкаў было адзначана на тэрыторыі Гомельскай вобласці — у сярэднім 111 мм, або 292% нормы, менш за ўсё — у Брэсцкай вобласці — 58 мм, або 151% нормы.
У трэцяй дэкадзе колькасць ападкаў перавысіла норму ў чатыры разы (40 супраць 10 мм).
Максімальная хуткасць ветру (24 м/с) зарэгістраваная 3 красавіка ў Навагрудку.
