Міліцыя прадухіліла вываз 17,5 т каляровага металу ў РФ

27 траўня, Позірк. Больш за 17,5 тон каляровага металу на суму звыш 21 тыс. рублёў (6,6 тыс. долараў) затрымана ў Аршанскім раёне, паведамляе прэс-служба Міністэрства ўнутраных спраў.

Супрацоўнікі Дзяржаўтаінспекцыі і аддзела па барацьбе з эканамічнымі злачынствамі выявілі каштоўны груз падчас агляду прычэпа грузавіка Scania. Кіроўца фуры, 48-гадовы жыхар Баранавічаў (Брэсцкая вобласць), спрабаваў звезці яго ў Расію — без дакументаў.

У дачыненні да мужчыны складзены адміністрацыйны пратакол за “парушэнне парадку вывазу з Беларусі лому і адкідаў чорных і каляровых металаў”. Паводле сцвярджэння МУС, яму пагражае “буйны штраф” і “канфіскацыя прадмета правапарушэння”. Груз выняты.