Літва прыпыніла афармленне грузавікоў у пункце пропуску Мядзінінкай, заяўляе Дзяржпагранкамітэт

1 чэрвеня, Позірк. У пункце пропуску Мядзінінкай (з беларускага боку — Каменны Лог) 1 чэрвеня прыпынена афармленне грузавога транспарту, паведамляе прэс-служба Дзяржаўнага пагранічнага камітэта.

Паводле інфармацыі ведамства, афармленне грузавікоў на ўезд і выезд з Літвы не будзе праводзіцца з 6:00 да 18:00 — праз тэхнічныя работы. Пры гэтым афармленне легкавога транспарта і аўтобусаў праходзіць у звычайным рэжыме.

Дзяржпагранкамітэт рэкамендаваў перавозчыкам “улічваць гэтую інфармацыю пры планаванні маршруту” і на час абмежаванняў выбіраць суседні пункт пропуску Беняконі (з літоўскага боку — Шальчынінкай).

Памежная і мытная службы Літвы пра прыпыненне афармлення грузавікоў у Мядзінінкаі не паведамляюць.